Google ընկերությունը հնարավորություն է ստեղծել Android օպերացիոն համակարգով գործող սարքերին Google Maps ծրագրին աշխատել նաև օֆլայն ռեժիմով, և օգտվել նրա քարտեզներից առանց ինտերնետ կապի: Այս մասին գրում է Google-ի բլոգը:
Գնալով այս կամ այն վայր՝ օգտատերը կարող է նախօրոք ներբեռնել այդ քարտեզներն իր հեռախոսի մեջ, եթե գիտի, որ այդ վայրում ինտերնետ հասանելիությունը բացակայում է: Դրա համար անհրաժեշտ է սմարթֆոններում տեղադրել Google Maps 5.7-ը, ընտրել կարգավորումներ/լրացուցիչ/Google լաբորատորիա: Այնտեղ հեշտությամբ կարելի է գտնել «ավտոնոմ օգտագործման քարտեզներ» հավելվածը:
Սակայն անցանց ռեժիմում աշխատելով՝ հնարավոր չի լինի տեսնել արբանյակից կատարված տեղանքի նկարները, ինչպես դա տեղի է ունենում առցանց ռեժիմում: Բացի այդ, քարտեզները անցանց ռեժիմում հասանելի կլինեն 30 օրվա ընթացքում, որից հետո նրանք ավտոմատ ջնջվում են: