Պոլսո պատրիարքարանում օրերս տեղի ունեցած Եկեղեցական ընդհանուր ժողովի դռնակ նիստի ժամանակ պատրիարքի տեղապահ է ընտրվել Սահակ եպիսկոպոս Մաշալյանը երկու ձայնի տարբերությամբ՝ 13 հոգի քվեարկել է Մաշալյանի, իսկ 11 հոգի՝ Արամ Աթեշյանի օգտին։ Աթեշյանը կարծում է, որ հոգևորականներին կաշառք է առաջարկվել, նրանց նկատմամբ ճնշումներ են գործադրվել:
Ստամբուլի «Ակօս» շաբաթաթերթի հայկական բաժնի խմբագիր Բագրատ Էստուկյանը «Առաջին լրատվական»-ի հետ զրույցում նշեց, որ Արամ Աթեշյանի մեկնաբանությունները՝ իբր թե կաշառք է առաջարկվել հոգևորականներին․ «Մենք մի քիչ զարմացած ենք Աթեշյանի արտահայտած մտքի վրա, բայց ոչ թե ճնշման, այլ կաշառքի մասին է խոսել։ Սա բավական ծանր մեղադրանք է, դրա համար զարմացած ենք։ Ինքն էլ անձամբ հոգևորականների վրա այս գործընթացի ընթացքում ծանր ճնշում է գործադրել, զանազան խոստումներ տվել»։
Այնուամենայնիվ, թե՛ Մաշալյանը, թե՛ Աթեշյանը, երկուսն էլ առանձնապես չեն վայելում համայնքի համակրանքը։ «Այս երկու թեկնածուների մեջ ես չունեի թեկնածու, որին կարելի էր համակրել, երկուսն էլ իրարից շատ չեն տարբերվում, ես անձամբ ուրախանալու առիթ չունեն։ Կուզեի՝ Արամը չընտրվեր, բայց այստեղ ես ուրախանալու առիթ չունեմ»,- հավելեց Էստուկյանը։
Այս երկու թեկնածուներին՝ Մաշալյան և Աթեշյան, առաջիկա պատրիարքի ընտրություններին հիմնական մրցակից է լինելու Սեպուհ արքեպիսկոպոս Չուլջյանը։ Վերջինս առաջիկայում կլինի Ստամբուլում։ Էստուկյանը վստահ է՝ Սեպուհ սրբազանի դեմ նույնպես դավադրություններ կլարեն, նախ կպնդեն, թե պետությունը դեմ է նրա թեկնածությանը, բայց սա չի նշանակում, որ Սեպուհ սրբազանը շանս չունի ընտրվելու։ Ընդհակառակը, համայնքը սովորաբար չի ընտրում այն թեկնածուներին, որոնք վայելում են թուրքական իշխանությունների համակրանքը։ Էստուկյանի խոսքերով՝ պետությունը, եթե աջակցում է որևէ թեկնածուի, հայ համայնքը հակառակ դիրքն է բռնում։
«Աթեշյանի կողմնակիցները համառորեն պնդում են, որ իրենց աջակցողներն ավելի շատ են, Մաշալյանն էլ ունի զորակցողների բանակը, բայց այս երկուսն էլ ժողովրդի մոտ այնքան աջակցություն չունեն, որքան Սեպուհ սրբազանը, նա ուզում է՝ իր դիրքերն ավելի զորանան, նոր գա Պոլիս»,- ասաց Էստուկյանը։
Վստահ չենք, որ Մայր Աթոռը նրան կաջակցի։
Մաշալյանը և Աթեշյանը, չնայած փոխադարձ քննադատություններին, փորձում են լավ հարաբերություններ ձևացնել, խուսափում են վեճերից։
