Դրական դինամիկայի մասին խոսելը դեռ վաղ է, առհասարակ որևէ գնահատական տալը դեռ շուտ է։ Այս մասին «Առաջին լրատվական»-ի հետ զրույցում նշեց Ճառագայթային բժշկության և այրվածքների գիտական կենտրոնի տնօրեն Գևորգ Սիմոնյանը՝ անդրադառնալով նախօրեին Երևան-Երասխ ճանապարհին ողբերգական վթարի հետևանքով այս հիվանդանոց տեղափոխված և վիրահատված անձանց մասին։
«Դեպքից հետո երեկ մեր բժշկական կենտրոնն ընդունել է 4 քաղաքացիների, որոնցից մեկը տեղափոխվել է մոտակա հիվանդանոցներից մեկը՝ ավելի մասնագիտական օգնություն ստանալու համար։ Մեզ մոտ հիմա երեք հիվանդ է, որոնք բոլորն էլ վերակենդանացման բաժանմունքում են։ Քաղաքացիներից մեկի վիճակը գնահատում ենք ծայրահեղ ծանր, մյուս երկուսը՝ ծանր։ Ծայրահեղ ծանր վիճակում գտնվող քաղաքացին արհեստական շնչառության սարքի ներքո է, մյուսներն ինքնուրույն շնչում են»,-ասաց նա։
Գևորգ Սիմոնյանը հավելեց, որ երկուսը կարողանում են խոսել, բայց նրանց մոտ շոկային երևույթներ են. «Նույնիսկ իրավապահ մարմիններից եկել էին, ւզում էին հարցեր տալ դեպքի հետ կապված, մենք խնդրեցինք հետաձգել, որովհետև, հնարավոր է, հիմա իրենց միտքն անգամ տեղում չլինի։ Նրանք հոգեբանական և ֆիզիկական շոկի մեջ են գտնվում»։
