Կեղծ նորությունները կամ այսպես կոչված ֆեյք նյուզը դարձել է համաշխարհային խնդիր, որը տեղեկատվական դարաշրջանի արատներից մեկն է: Դրա դեմ պայքարը զգալիորեն անցնում է խոսքի ազատության եզրով, և այստեղ պարբերաբար առաջանում է ֆեյք-նյուզի դեմ պայքարելիս խոսքի ազատությանը չվնասելու խնդիր: Ինչպես գիտեք, Հայաստանի վարչապետին առընթեր Հանրային կապերի և տեղեկատվության կենտրոն ՊՈԱԿ «Տեկեկատվության ստուգման կենտրոն» ծրագիրը անդրադարձել է համացանցում տարածված կեղծ նամակին, որն իբր Հայաստանի վարչապետը հղել է ՆԱՏՕ-ի գլխավոր քարտուղարին: Ծրագիրը հայտնում է, որ կեղծ նամակը համացանցում շրջանառվում է հունիսի 24-ից: Անհայտ օգտատերը այն շրջանառել է նախ ֆրանսիական տիրույթում, հետո ադրբեջանական և ռուսական ֆորումներում:
Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Արմեն Հովհաննիսյանը, քաղտեխնոլոգ Արմեն Բադալյան, սոցիոլոգ Արտակ Սաղաթելյանը:
Արմեն Հովհաննիսյանի դիտարկմամբ՝ սա հիբրիդային պատերազմի տիպիկ օրինակ է: «Քանի որ առաջին հերթին ոչ հայկական տիրույթում է տարածվել, ապա ունի նպատակ ներկայիս կառավարության արտաքին քաղաքականության մասին խեղված կարծիք ստեղծել՝ շահարկելով ամենանուրբ հարցերը, որ մեր անվտանգության հետ են կապված… Այն, որ տարածվում է ադրբեջանական տիրույթում, նաև Հայաստանում էր ակտիվորեն սկսել տարածվել, դա նշանակում է, որ հիբրիդային պատերազմի մի մասն է: Այն երկրները, որոնք շահագրգռված են, որ Հայաստանը ինչ-ինչ հարցերում ավելի զիջող դիրքերից հանդես գա կամ այս կառավարությունը տապալվի, նրանք կարող են դիմել նաև այդպիսի արմատական ֆեյք նյուզի»:
Ա. Սաղաթելյանի խոսքով՝ խոսքը մեծ ազդեցություն է ունենում հանրային տրամադրությունների վրա, և այս դեպքերը նույնպես. «Կենցաղային մանր հարցերից արդեն անցել են ակնհայտ սուտ տեղեկատվության, ինչն իր ազդեցությունը թողնելու է»:
«Կեղծ լուրերը կոմպրոմատի կետերից մեկն են, նպատակը հիմնականում թիրախում հայտնված անձի իմիջին հարվածելն է,- նշեց Ա. Բադալյանը: -Այս նամակով կոնկրետ նպատակ էր դրվել. նշելով, որ իբրև թե վարչապետն ուզում է զորքերը դուրս բերել Ղարաբաղից՝ փորձ է արվել Հայաստան-Ղարաբաղ հարաբերություններում խնդիրներ առաջացնել, և նշելով, որ ուզում է ՆԱՏՕ-ին անդամագրվել՝ փորձ է արվում խնդիրներ առաջացնել Հայաստան-Ռուսաստան հարաբերություններում»:
Քննարկման մասնակիցների դիտարկմամբ՝ դժվար է ասել, թե ով է ֆեյք նյուզերի պատվիրատուն: «Չենք կարող ասել, թե այս նախաձեռնությունն ում է պատկանում, դա կարող է լինել և՛ Ռուսաստանից, և՛ Ադրբեջանից, և՛ Հայաստանից՝ ընդդիմության մի թևի կողմից, կարող է լինել անգամ իշխանական ճամբարից: Կարող է բոլորովին այլ կողմից լինել… Մենք չենք կարող ասել՝ ով հեղինակը»,- նշեց Ա. Բադալյանը՝ ընդգծելով, որ մեզ համար սա անվտանգային խնդիր է:
Մանրամասն՝ տեսանյութում:
