Ամերիկյան Հարվարդ-Սմիթսոնյան կենտրոնի աստղաֆիզիկոսները հայտարարել են կարևոր բացահայտման մասին. նրանց հաջողվել է ֆիքսել, այսպես կոչված, ռելիկտային գրավիտացիոն ալիքները, որոնք առաջացել են 13.8 մլրդ տարի առաջ՝ Մեծ պայթյունից անմիջապես հետո:
Գրավիտացիոն ալիքների գոյությունը կանխատեսվել էր դեռևս 100 տարի առաջ՝ Ալբերտ Էյնշտեյնի կողմից, սակայն մինչ օրս գիտնականներին չէր հաջողվել այդ վարկածը հաստատել գործնական դիտարկումներով:
Այդ ազդանշանի գրանցումը ներկայում տիեզերքի ուսումնասիրման հիմնական խնդիրներից մեկն է՝ ասել է նախագծի հեղինակ Ջոն Կովակը՝ ընդգծելով, որ իրենց բացահայտումը դեռևս պետք է հաստատվի այլ հետազոտություններով:
Գիտնականների խոսքով՝ գրավիտացիոն ալիքների գրանցումը թույլ է տալիս նայել դեպի հեռու՝ տիեզերքի անցյալը, և ապացուցում է ինֆլյացիոն մոդելի ճշմարտությունը, որը ենթադրում է Մեծ պայթյունից հետո տիեզերքի էքսպոնենտալ ընդլայնում:
Ալիքները գրանցվել են Հարավային բևեռում տեղակայված BICEP2 ռադիոաստղադիտակի օգնությամբ:
