Մոսկվան Վաշինգտոնին և Թեհրանին համոզում է տարաձայնությունները կարգավորել երկխոսության միջոցով:
Հունիսի 26-ին կայացած մամուլի ասուլիսում այդ մասին հայտարարել է Ռուսաստանի արտաքին գործերի նախարարության ղեկավար Սերգեյ Լավրովը՝ տեղեկացնում է TASS-ը:
«Մենք ամերիկացի և իրանցի գործընկերներին համոզելու ենք, որ անհրաժեշտ է հետ քաշվել այդ վտանգավոր սահմանագծից և սկսել հակասությունները կարգավորել քաղաքակիրթ երկխոսության միջոցով:
Անշուշտ, դա ենթադրում է վերջնագրերի, պատժամիջոցների և շանտաժի քաղաքականության դադարեցում»,- ընդգծել է նախարարը:
Լավրովը նշել է, որ Իրանի շուրջը հնարավոր ռազմական սցենարը կարող է կործանարար դառնալ և միջազգային ճգնաժամ հարուցել: «Դա կործանարար կլինի թե՛ Մերձավոր Արևելքի տարածաշրջանի և թե՛ Հյուսիսային Աֆրիկայի համար: Դա միջազգային ճգնաժամ կլինի»,- եզրափակել է Լավրովը:
