«Այս ակտիվությունը պայմանավորված է նրանով, որ Կազանում չարդարացվեցին այն հույսերը, որոնք կային մինչև հանդիպումը, և այժմ կա որոշում չթողնել այդ գործը կես ճանապարհին, այլ փորձել հասնել գոնե անցումային ինչ-որ արդյունքի»,- «Առաջին լրատվականի» հետ զրույցում անդրադառնալով կազանյան հանդիպումից հետո միջազգային հանրության դրսևորած աննախադեպ ակտիվությանը՝ կարծիք հայտնեց Ռուսաստանի քաղաքական կոնյունկտուրայի կենտրոնի գլխավոր տնօրեն Սերգեյ Միխեևը:
Նա նաև նկատեց, որ այդ ակտիվության պատճառներից մեկն էլ Ռուսաստանում սպասվելիք նախագահական ընտրություններն են. «Հայտնի է, որ բավականին ակտիվ դերակատարություն բանակցային գործընթացում վերջին շրջանում խաղացել է Դմիտրի Մեդվեդևը, իսկ կլինի՞ նա Ռուսաստանի հաջորդ նախագահը, թե՞ ոչ՝ դեռևս պարզ չէ: Ակնհայտ է, որ Մեդվեդևը ցանկանում է մինչ իր պաշտոնավարման ժամկետի ավարտը ինչ-որ արդյունք արձանագրել»:
Անդրադառնալով այն դիտարկմանը, թե այդ ակտիվությունը պայմանավորվա՞ծ է նրանով, որ համանախագահների, ինչպես նաև Եվրամիության միջև որոշակի մրցակցություն կա խնդրի կարգավորումը սեփական ձեռքը վերցնելու հարցում՝ Միխեևը նշեց. «Քարտ-բլանշը տրամադրված է եղել Մեդվեդևին, սակայն արդյունքներ չեն արձանագրվել, և թերևս այդ ֆոնին փորձում են ակտիվանալ մյուս միջնորդները, սակայն ինչպես երևում է, նրանց գործունեությունը կոորդինացված է և Մեդվեդևն էլ է մասնակցում այդ ամենին»:
Միխեևի գնահատմամբ` ղարաբաղյան հակամարտության կարգավորումը քիչ հեռանկարներ ունի, և այդ մրցակցությունը կնշանակի մրցակցություն անհեռանկարային դիրքերից. «Ավելին`չեմ կարծում, որ Եվրամիությունը, ԱՄՆ-ն կամ Ֆրանսիան ունեն ինչ-որ յուրահատուկ ծրագիր, որն ընդունելի է կոնֆլիկտի բոլոր կողմերի համար և հենց վաղը կարող են այն հրապարակել»:
