Մարտի 1-ի գործով մեղադրյալ Ռոբերտ Քոչարյանին կրկին կալանավորելու որոշում է կայացվել։ Այն հրապարակել է Վերաքննիչ քրեական դատարանի դատավոր Արմեն Դանիելյանը։ Այսպիսով` բավարարելով դատախազության և տուժող կողմի ներկայացրած բողոքը։ Դատարանը նաև բեկանել է գործը կասեցնելու և Սահմանադրական դատարան ուղարկելու որոշումը։
Այս դատավարության ընթացքում շատ խոսվեց այն մասին, որ Ռոբերտ Քոչարյանը և նրա թիմը փորձում են գործը իրավական փակուղի տանելու ճանապարհով գնալ։ Հիմա կարող ենք ասել, որ այս էտապն ավարտվում է, և թևակոխում ենք նոր զարգացումների շրջափո՞ւլ, թե՞ ամեն ինչ դեռ առջևում է «Առաջին լրատվական»-ի հարցին քաղաքագետ Արմեն Վարդանյանը պատասխանեց․ «Կարծում եմ՝ դեռ ամեն ինչ առջևում է, գործընթացն անակնկալներով լի է՝ անընդհատ դատարանն անսպասելի որոշումներ է կայացնում։ Չգիտենք՝ ինչ կլինի մոտ ապագայում, բայց ես կարծում եմ, որ իրոք, Քոչարյանի փաստաբանական թիմն ամեն կերպ փորձում է ձգձգել այս դատը, քանի որ բուն դատավարության ժամանակ կարող են հնչել սենսացիոն հայտարարություններ, որոնք նրանք չեն ուզում, որ հասարակությանը հայտի դառնա»։
Իսկ վերլուծաբան Դավիթ Հովհաննիսյանն ասաց․ «Այո, ես համաձայն եմ, որ Ռոբերտ Քոչարյանի թիմն արդեն մեկ տարի է փորձում է գործը տեղափոխել Սահմանադրական դատարան, որովհետև այս պահին Սահմանադրական դատարանը մնացել է հակաիշխանական ուժերի վերջին բաստիոնը։ Սահմանադրական դատարանն իր ոչ լեգիտիմ նախագահով մնացել է այն վերջին հանգրվանը, որտեղ նրանք փորձում են տեղափոխել գործը, և դրանով փակել այդ գործը»։
Մանրամասները՝ տեսանյութում։
