Կողմ 94, դեմ՝17. քվեների այսպիսի հարաբերակցությամբ ՀՀ Ազգային ժողովը հավանություն է տվել 2018 թվականի պետական բյուջեի կատարման մասին տարեկան հաշվետվությունը հաստատելու մասին ԱԺ որոշման նախագծին:
Բյուջեի կատարողականին դեմ է քվեարկել ԲՀԿ խմբակցությունը: Առաջին հայացքից մոտիվացված է թվում, որ խորհրդարանական ամենամեծ ընդդիմադիր խմբակցությունն այս կարևոր հարցում հակադրվում է կառավարությանը: «Լուսավոր Հայաստան» կուսակցությունն այս անգամ կողմ է քվեարկել բյուջեի կատարողականին։
Փորձենք հասկանալ խորհրդարանական ուժերի քաղաքական վարքագիծը: Թեմայի շուրջ «Առաջին լրատվական»- ի հետ քննարկմանը մասնակցեցին «Լուսավոր Հայաստան» խմբակցության պատգամավոր Տարոն Սիմոնյանը, ԲՀԿ խմբակցության պատգամավոր Սերգեյ Բագրատյանը և «Իմ քայլը» խմբակցության պատգամավոր Համազասպ Դանիելյանը:
«Այս բյուջեն ՀՀԿ-ի կազմած բյուջեն է, որը 2017թ. ներկայացվել է խորհրդարան, և մեր խմբակցությունը դեմ է քվեարկել,- Նշեց Սերգեյ Բագրատյանը՝ հավելելով, որ նոր իշխանությունը մայիսից հետո է պատասխանատու այդ բյուջեի համար:- Մենք տնտեսական վերլուծություն ենք կատարել: Ի սկզբանե այն թվերը, որ դրված էին այդ բյուջեի հիմքում, լուրջ չեն եղել: Երբ որ ՀՀԿ-ն ներկայացրեց, մենք քննադատել ենք այդ բյուջեն, համարում ենք, որ դա զարգացման բյուջե չէ, նախանշված չէին այն ոլորտները, որտեղ ներդրումներ պետք է արվեին… Եթե մենք ի սկզբանե չենք ընդունել այն հիմքերը, որոնց վրա պետք է կառուցվեր այդ բյուջեն, բնականաբար կատարողականը պետք է մերժվեր մեր խմբակցության կողմից: Մենք կողմ քվեարկելու շանս չունեինք»:
Համազասպ Դանիելյանը հավելեց, որ այսօրվա քվեարկությունը վերաբերում էր կատարողականին. «Այս բյուջեն իրականացվել է երեք տարբեր կառավարությունների կողմից…»:
«Մենք, իհարկե, նկատել ենք թերություններ, այդ մասին բարձրաձայնել ենք ԱԺ-ում բյուջեի կատարողականի քննարկման ժամանակ, բայց միևնույն ժամանակ ընդգծել ենք, որ ըմբռնումով ենք մոտենում հեղափոխական իշխանության կատարողական գործողություններին, առավել ևս, որ մեր խմբակցության ներկայացուցիչը ևս եղել է այդ կառավարության կազմում: Հասկանում ենք, որ այդ բյուջեն նախորդ իշխանությունների կողմից է ձևավորվել, և նոր իշխանությունը ստիպված էր կատարել այն, ինչ նախորդները թողել էին: Առկա թերությունները բացասական եզրակացություններ անելու հիմք չեն տալիս: Թերությունների մասին բարձրաձայնել ենք, որպեսզի կառավարությունն այս տարի հաշվի առնի և այդ թերությունները վերացնելու ուղղությամբ աշխատանքներ իրականացնի»: Տ. Սիմոնյանը նաև հավելեց, որ բյուջեի կատարողականին դեմ քվեարկելը կնշանակեր անվստահություն հայտնել. «Անցած տարվա կառավարությանը անվստահություն հայտնելու համար մենք հիմքեր չենք տեսել»:
Ս. Բագրատյանը նաև կարծիք հայտնեց, որ որոշ լծակներ պետք է փոխանցել ընդդիմությանը: «Մենք չենք կարող իշխանության բոլոր որոշումներին կողմ քվեարկել, մեր ընդդիմություն լինելու շեշտադրումը պետք է միշտ ունենանք»,- նշեց ԲՀԿ խմբակցության պատգամավորը: Հ. Դանիելյանը հավելեց, որ ընդդիմությանը լծակներ արդեն տրված են:
Մանրամասն՝ տեսանյութում:
