Գեղարքունիքի մարզի ընդհանուր իրավասության դատարանում Վարդան Հարությունյանի նախագահությամբ ավարտվել է Արամ Մկրտչյանի գործի դատական քննությունը:
Ըստ դատական ակտի՝ մարզի Ծափաթաղ գյուղի 32-ամյա բնակիչ Արամ Մկրտչյանը 2012 թվականի նոյեմբերի 20-ին, ժամը 20-ի սահմաններում իրենց տնից ոչ հեռու վիճաբանել է նույն գյուղի բնակիչ Վիտալիկ Սարաջյանի հետ:
Նրանց հաշտեցնելու, բաժանելու նպատակով միջամտել է համագյուղացի Արարատ Նաղդալյանը:
Արամ Մկրտչյանը նախ լապտերով հարվածներ է հասցրել Սարաջյանին՝ մինչև որ լապտերը ջարդվել է:
Այնուհետև Մկրտչյանը, ըստ դատական ակտի, դանակը մխրճել է հաշտեցնելու համար կռվին միջամտած համագյուղացի Արարատ Նաղդալյանի քունքի մեջ:
Կռվին ներկա երիտասարդներից մեկը, տուժող Նաղդալյանի եղբոր խնդրանքով, դանակը հանել է տուժողի գլխից: Նրան տեղափոխել են Ճամբարակի հիվանդանոց, որտեղ Արարատ Նաղդալյանը գիտակցության չգալով՝ մահացել է:
Այս դեպքից մոտ մեկ ամիս առաջ՝ հոկտեմբերի 25-ին, Արամ Մկրտչյանը Գեղարքունիքի մարզի ընդհանուր իրավասության դատարանի դատավճռով մեկ այլ հանցավոր արարքի համար դատապարտվել էր 500 հազար դրամ տուգանքի:
Համագյուղացուն սպանելու համար Արամ Մկրտչյանը դատարանում իրեն մեղավոր չի ճանաչել, ասել է, թե ինքը դանակով Արարատ Նաղդալյանին չի հարվածել:
Այլ ապացույցների համակցությամբ ընդհանուր իրավասության դատարանը Արամ Մկրտչյանին մեղավոր է ճանաչել լապտերով Վիտալի Սարաջյանին հարվածներ հասցնելու, վնասելու և դանակի գործադրմամբ Արարատ Նաղդալյանին սպանելու համար՝ ՀՀ քրեական օրենսգրքի 117 հոդվածով և 104 հոդվածի 1-ին մասով:
Արամ Մկրտչյանը դատապարտվել է 15 տարի ազատազրկման և 150 հազար դրամ տուգանքի:
Այս պատժին գումարվել է նաև նախորդ դատավճռով սահմանված 500 հազար դրամ տուգանքը, և վերջնական պատիժ է սահմանվել 15 տարի ազատազրկումն ու 650 հազար դրամ տուգանքը:
Հօգուտ տուժողի իրավահաջորդի՝ Արամ Մկրտչյանից կբռնագանձվի 2 միլիոն դրամ:
