«Հայաստանի Հանրապետության բյուջետային համակարգի մասին» ՀՀ օրենքի 21-րդ հոդվածի 1-ին մասի պահանջներին համապատասխան ընդունված ՀՀ վարչապետի 2019 թվականի մարտի 22-ի «Հայաստանի Հանրապետության 2020 թվականի բյուջետային գործընթացն սկսելու մասին» N-289-Ա որոշմամբ սկսվել է 2020 թվականի բյուջետային գործընթացը և հաստատվել է ՀՀ 2020 թվականի պետական բյուջեի մշակման գործընթացի` ՀՀ 2020-2022 թվականների պետական միջնաժամկետ ծախսերի ծրագրի և ՀՀ 2020 թվականի պետական բյուջեի նախագծի մշակման աշխատանքների իրականացման ժամանակացույցը: Այն իրենից ներկայացնում է մեկ ընդհանուր գործընթաց, որը սկսվում է ընթացիկ տարվա հունվար ամսին և ավարտվում է նոյեմբեր-դեկտեմբեր ամիսներին՝ ՀՀ ԱԺ կողմից պետական բյուջեի մասին օրենքի ընդունմամբ:
Դուք առաջարկել էիք, որ հանրային քննարկումներ իրականացնել այս թեմայի շուրջ, ինչի՞ մասին է խոսքը «Առաջին լրատվական»-ի հարցին Իրավաբանների հայկական ասոցիացիայի և Հանրային խորհրդի պետաիրավական հանձնաժողովի նախագահ Կարեն Զադոյանը պատասխանեց․ «Մենք ունենք պարզեցված բյուջե հասկացությունը։ Դա այն բյուջեն է, որը պետք է քաղաքացիներին կամ քաղաքացիական մասնագիտացված խմբերին հասու լինի, և նրանք կարողանան դրա միջոցով ազդել յուրաքանչյուր տարվա բյուջեի կազմման գործընթացին։ 2018 թվականին Հայաստանում իրավիճակ է փոխվել, համատեքստն այլ է, և շատ կարևոր է, որպեսզի այդ ծրագրային բյուջեները բխեն կառավարության ծրագրի առաջնահերթություններից, իսկ ծախսերն էլ լինեն արդյունավետ ու արտահայտեն հենց այդ ծրագրերը։ Ես, որպես Իրավաբանների հայկական ասոցիացիայի և Հանրային խորհրդի պետաիրավական հանձնաժողովի նախագահ, նաև Հանրային խորհրդին առաջարկեցի, որ Հանրային խորհուրդն էլ ներգրավվի այս ծրագրի մեջ։ Այնուհետև, Հանրային խորհրդի որոշումով գրություն ուղարկվեց վարչապետին, որպեսզի Հանրային խորհուրդն էլ ներգրավվի։ Դրանից հետո վարչապետը տվեց հանձնարարական, որպեսզի հասարակական կազմակերպությունների և Հանրային խորհրդի հետ սկսվեն քննարկումները»։
Իսկ հանրային ֆինանսների կառավարման փորձագետ Հովհաննես Ավետիսյանն ասաց․ «Մենք անընդհատ խոսում ենք հարկերի մասին, հարկային եկամուտների մասին, բայց գրեթե չենք խոսում ծախսերի մասին։ Այսինքն՝ պետությունն ի՞նչ ուղղություններով է իր ծախսերը կատարում, ինչպե՞ս է տնօրինում այդ հավաքագրվող, հարկատուների վճարած հարկերը։ Դա շատ կարևոր է, որովհետև երկրի, պետության, տնտեսության և ցանկացած զարգացում պայմանավորված է ծախսերով»։
Մանրամասները՝ տեսանյութում։
