«Ծիծաղելի է։ Ես ծիծաղով եմ վերաբերում այդ լուրերին»,- «Առաջին լրատվական»-ի հետ զրույցում ասաց Արթուր Հարությունյանը՝ անդրադառնալով մամուլում շրջանառվող լուրերին, թե ինքը ներգրավված է նախօրեին Աբովյանի քաղաքապետի ընտրություններից առաջ՝ լռության օրը տեղի ունեցած դեպքում, երբ հրկիզել էին թեկնածուներից մեկի ենթաշտաբի պետի ավտոմեքենան և բնակարանի մուտքը։ «Այդ լուրերը հիմարություններ են։ Ես ոչ մի բան չունեմ դրա հետ կապված ասելու։ Այդ լուրերի տարածողների մամաներն են երևի կապված այդ միջադեպի հետ»,- ասաց Հարությունյանը՝ հրաժարվելով պատասխանել մեր մյուս հարցերին։ Մասնավորապես՝ Ծառուկյանի ֆակտորո՞վ է գուցե պայմանավորված, որ նման լուրեր են դրվում շրջանառության մեջ։
Հիշեցնենք, որ այսօր հայտնի դարձավ, որ երեկոյան Քննչական կոմիտեում հարցաքննվելու է ԲՀԿ առաջնորդ Գագիկ Ծառուկյանը՝ Աբովյանում քաղաքապետի ընտրությունների նախօրերին ՔՊ-ական թեկնածուի շտաբի պետի տան ու մեքենայի հրդեհման գործով հարուցված քրեական գործի շրջանակներում: Գագիկ Ծառուկյանը հարցաքննության է կանչվել վկայի կարգավիճակով։ Նրան հարցաքննության կանչելու անհրաժեշտությունն առաջացել էր այն բանից հետո, երբ ԱԺ-ում, Ծառուկյանը անդրադառնալով այդ գործին՝ կարծիք էր հայտնել, որ դա սարքած գործ է։ «Եթե չբացահայտվի, ապա մեր իրավապահ մարմինները լիարժեք իրենց տեղում չեն։ Պետք է բացահայտվի, և մեղավորները պետք է Աբովյանից բացակայեն։ Հենց նրանք են «մուտիլովչիկները», որոնք այդպիսի քայլերի են գնում։ Դա շինծու, սարքած գործ էր։ Վարչապետը պետք է պարտադրի, որպեսզի այդ գործը բացահայտվի»,- ասել էր նա։ Քննչական մարմինները Ծառուկյանի հարցաքննությամբ փորձում են պարզել՝ ինչի հիման վրա է նման հայտարարություն արել ԲՀԿ նախագահը։
Ինչ վերաբերում է Արթուր Հարությունյանին, որը Գագիկ Ծառուկյանի սանիկն է, բայց Ծառուկյանի հետ թշնամական հարաբերությունների մեջ է, Աբովյանի քաղաքապետի ընտրություններից առաջ հայտարարել էր, որ սատարելու է իշխանության թեկնածուին։ «Քանի որ Նիկոլ Փաշինյանը ընտրված է ժողովրդի կողմից և Աբովյանի ընտրություններում ներկայացնում է իր թեկնածուին, ապա ես ճիշտ չեմ համարում իմ թեկնածությունն առաջադրել և դեմ գնալ ժողովրդի ձայները ստացած ուժի թեկնածուին։ Ես չեմ առաջադրվելու և պաշտպանելու եմ Նիկոլ Փաշինյանի կուսակցության կողմից առաջադրված թեկնածուին»,- ավելի վաղ մեզ հետ զրույցում ասել էր նա։
Եվ այսօր Հարությունյանը մեզ հետ զրույցում ասաց, որ զավեշտալի է համարում իր այդ հայտարարություններից հետո իր անունը որևէ կերպով այդ միջադեպում հոլովելը։ Արթուր Հարությունյանը պնդեց, որ ինքը հարցաքննության չի կանչվել և չի էլ կանչվելու։ «Ինչի մասին է խոսքը։ Դա հիմարություն է»,- ասաց նա՝ ավարտելով զրույցը։
Նշենք, որ այս միջադեպերով, որպես կասկածյալ, առայժմ ոչ ոք չի ներգրավվել, վկայի կարգավիճակում հարցաքննվել է ավելի քան 20 մարդ։
Քննչական կոմիտեից մեզ տեղեկացրին, որ նշանակվել են մի շարք փորձաքննություններ: Նախաքննությունը շարունակվում է։
