Ինչպես հայտնի է, Աբովյանի քաղաքապետի ինտրիգային ընտրությունները արդեն անցյալ են: Հաղթել է գործող քաղաքապետ Վահագն Գևորգյանը, որը ԲՀԿ ոչ ֆորմալ թեկնածուն է: ԲՀԿ-ն չի հայտարարել նրան աջակցելու մասին, սակայն բոլորին է հայտնի, որ ոչ միայն աջակցել է, այլ քաղաքապետը փաստացի հենց ԲՀԿ թեկնածուն է: Կառավարող ՔՊ թեկնածուն պարտվել է:
Ուշագրավ են և՛ ԲՀԿ ղեկավարի, և՛ վարչապետի հետընտրական գնահատականները: Նիկոլ Փաշինյանը հայտարարեց, որ հաղթել է հեղափոխությունը, որովհետև այն արվել է նաև հենց այն բանի համար, որ իշխանությունը ամեն տեղ չունենա երաշխավորված հաղթանակ: Մեծ հաշվով, Փաշինյանի այդ փաստարկը դժվար է ենթարկել առարկության:
Այնուամենայնիվ, հանրությանը հուզում է հարցը, թե ինչու Աբովյանում պարտվեց ՔՊ թեկնածուն: Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, «Անտարես» հրատարակչության տնօրեն Արմեն Մարտիրոսյանը, «Քաղաքացու որոշում» կուսակցության գործադիր մարմնի անդամ Գոռ Հակոբյանը:
Հակոբ Բադալյանի կարծիքով՝ ՔՊ թեկնածուն պարտվեց, քանի որ այն տարածքում, որտեղ տեղի էր ունենում ընտրությունը, շատ ուժեղ է ԲՀԿ-ի դիրքերը: «Աբովյանը, այսպես ասած, Գագիկ Ծառուկյանի բոստանն է, և սա որևէ մեկի համար գաղտնիք չէ: Բացի դրանից՝ ՔՊ-ն, լինելով կառավարող երիտասարդ ուժ, խնդիր ունի տեղերում մրցունակ թեկնածուների,- նշեց վերլուծաբանը:- Արտառոց բան տեղի չի ունեցել: Տարակուսելի են ապոկալիպտիկ գնահատականները իշխանության կամ հեղափոխության պարտության մասին: Ողջունելի է, որ իշխանությունը չի առաջնորդվել ամեն գնով սեփական թեկնածուին անցկացնելու սկզբունքով, սա իսկապես հեղափոխության նպատակներից մեկն էր»:
Արմեն Մարտիրոսյանի դիտարկմամբ՝ առողջ ուժի համար պարտությունը դաս է: Նրա խոսքով՝ Հայաստանում քաղաքապետի և գյուղապետի ընտրության ժամանակ մեծ դեր է ունենում այն, թե թեկնածուն ում ցեղից է՝ «ումոնցի է»:
«Կուզեի, որ մի քաղաքում հաղթեր ուղնուծուծով քաղաքական մարդ և վերափոխեր քաղաքը,- նշեց Արմեն Մարտիրոսյանը: Գոռ Հակոբյանը հավելեց, որ դրա համար պետք է Սահմանադրական փոփոխություններ լինեն:
Ի՞նչ տվեց ԲՀԿ-ին այս հաղթանակը: Ա. Մարտիրոսյանի դիտարկմամբ՝ այս հաղթանակը գլխապտույտ ուրախություն պարգևեց ԲՀԿ-ին, բայց նաև մարտահրավեր. «Այս քաղաքում պետք է լինեն արտառոց փոփոխություններ. ընդդիմադիր ուժը շանս ունի իրեն ցույց տալու, որի համար ոչ մի բանի պակաս չկա, Աբովյանը պետք է դառնա Հայաստանի լավագույն քաղաքը. մի տարի սպասենք, կարծում եմ՝ արդյունքով պետք է չափել ամեն ինչ»:
«Փաշինյանը փորձում է հայտնի ռեժիսորների նման թույլ դերասաններով ֆիլմ նկարել. Փաշինյանը և՛ «ռեժիսոր» է, և՛ գլխավոր դերում է: Բայց պետք է «խաղադրույքը» դնել ուժեղ, բանիմաց, փորձառու, գիտելիք ունեցող «խաղացողների» վրա»,- ընդգծեց Ա. Մարտիրոսյանը:
Մանրամասն՝ տեսանյութում: