Միջուկային համաձայնագիրը ստորագրած եվրոպական երկրներն ու մնացած կողմերը պարտավոր են կարգավորել Իրանի հետ տնտեսական հարաբերությունները: Այդ մասին հայտարարել է ԻԻՀ-ի ԱԳ նախարար Մուհամեդ Ջավադ Զարիֆը, հաղորդում է Mehr-ը:
Նրա խոսքերով, Ճապոնիայի վարչապետ Սինձո Աբեի Իրան առաջիկա այցը, ինչպես նաև նախագահ Հասան Ռուհանիի այցը Տաջիկստան և Ղրղզստան հիանալի հնարավորություն կլինեն Իրանական Հանրապետության համար որոշելու իր քաղաքականությունը, քննարկելու ապագայի ծրագրերն ու գտնելու լուծումեր ամբողջ աշխարհին ուղղված քայքայիչ քաղաքականությանը դիմադրելու համար:
«Եվրոպացիներն Իրանին քննադատելու առիթ չունեն անգամ այն ոլորտներում, որոնք կապ չունեն միջուկային համաձայնագրի հետ: Արևմուտքի քաղաքականությունը տարածաշրջանում մեզ միայն վնաս է հասցրել: Միջուկային համաձայնագիրը ստորագրած եվրոպական երկրներն ու մնացած կողմերը պարտավոր են կարգավորել Իրանի հետ տնտեսական հարաբերություններում ստեղծված իրավիճակը»,- նշել է Զարիֆը:
Մայիսին Իրանը հայտարարել էր, որ միջուկային համաձայնագրի շրջանակներում դադարեցնում է իր պարտավորությունների մի մասի կատարումը և համաձայնագրի մնացած կողմերին 60 օր ժամկետ էր տրամադրել իրենց պարտավորությունները կատարելու համար՝ հատկապես այն դրույթների, որոնք վերաբերում են Իրանի տնտեսական շահերին բանկային և էներգետիկայի ոլորտներում:
Իրանն ընդգծել է, որ մտադիր չէ հրաժարվել համաձայնագրից, և իր պարտավորությունները դադարեցնելու մասին որոշումը ելնում է համաձայնագրի դրույթներից:
