Որոտանի ՀԷԿ-ի վաճառքը իրավական առումով բազմաթիվ հարցերի տեղիք է տալիս: Այս մասին այսօր լրագրողների հետ հանդիպման ժամանակ ասաց տնտեսագետ Վահագն Խաչատրյանը: Նրա խոսքով՝ նախ պարզ չէ, թե ինչու մասնավորեցումը չի ընթացել ընդհանուր կանոնների համաձայն և չի ներառվել մասնավորեցման ցանկում: Ինչո՞ւ է կառավարության համապատասխան որոշումը երկար ժամանակ թաքցվել: Ո՞վ է, ի վերջո, վաճառողը, և ուր է գնացել կամ գնալու վաճառքից ստացվելիք 180 միլիոն դոլարը:
Մինչ այժմ, ըստ տնտեսագետի, պարզ չէ՝ որտեղ է այդ 180 միլիոնի այն մասը, որը պետք է վճարվեր անմիջապես (գումարի մեծ մասը՝ մոտ 110 միլիոն դոլարը, պետք է փոխանցվի մեկ տարի հետո):
Ինչ վերաբերում է գնորդին, ապա, ըստ Վ. Խաչատրյանի, նրանց շահագրգռվածությունը մեծ էր, քանի որ առաջիկա տարիների համար բավականին բարձր սակագներ են ֆիքսվում: Այսպես, արդեն իսկ բարձրացվել է ՀԷԿ-ից գնվող 1 կիլովատ/ժամ էլեկտրաէներգիայի սակագինը մինչև 7.9-8.2 դրամ՝ նախկին 4.3-ի փոխարեն, և մինչև 2037 թվականը նախատեսվում է սակագինը բարձրացնել մոտ 4 անգամ:
Լուսանկարը՝ Photolure-ի
