Հուլիսի 6-ին Անհայտ զինվորի հուշարձանին՝ Անմար կրակի մոտ ծաղկեպսակի զետեղումով և Մեծ Հայրենական պատերազմում զոհվածներին հարգանքի տուրք մատուցելով, մեկնարկեց Հայաստանի արտգործնախարար Էդվարդ Նալբանդյանի պաշտոնական այցելությունը Ռուսաստան:
Այնուհետև ՌԴ ԱԳՆ ընդունելությունների տանը տեղի ունեցավ ԱԳ նախարար Էդվարդ Նալբանդյանի և Ռուսաստանի արտգործնախարար Սերգեյ Լավրովի հանդիպումը:
Ողջունելով Հայաստանի արտգործնախարարին` Ռուսաստանի ԱԳՆ ղեկավարը նշեց, որ երկու արտաքին քաղաքական գերատեսչությունների ղեկավարների հանդիպումները առանձնանում են փոխվստահությամբ, կառուցողականությամբ և դաշնակցային հարաբերություններին բնորոշ հատուկ բովանդակությամբ:
Շնորհակալություն հայտնելով Մոսկվա պաշտոնական այցելության հրավերի և ջերմ ընդունելության համար` Էդվարդ Նալբանդյանն ասաց. «Երկու երկրների ղեկավարների միջև շփումների պարբերականությունը կանխորոշված է հայ-ռուսաստանյան դաշնակցային գործընկերության բնույթով, որոնք վերջին երեք տարիներին տեղի են ունենում առանձնահատուկ ինտենսիվությամբ: Դրանով են պայմանավորված նաև արտաքին քաղաքական գերատեսչությունների ղեկավարների հաճախակի հանդիպումները»:
Էդվարդ Նալբանդյանն ու Սերգեյ Լավրովը քննարկեցին երկու պետությունների ղեկավարների միջև ձեռք բերված պայմանավորվածությունների իրականացման ընթացքը, երկուստեք գոհունակությամբ նշվեց, որ այդ պայմանավորվածությունները ամբողջապես, հարաբերությունները պետությունների միջև վերընթաց զարգացում են ապրում և հարստանում են նոր բովանդակությամբ:
Հայաստանի և Ռուսաստանի արտգործնախարարները հանգամանալից զրույց ունեցան երկկողմ հարաբերությունների օրակարգային հարցերի լայն շրջանակի շուրջ, անդրադարձան իրավապայմանագրային դաշտի կատարալեգործմանը՝ գոհունակությամբ նշվելով, որ երկու երկրների միջև ստորագրված են շուրջ երկու հարյուր պայմանագրեր, համաձայանգրեր և այլ փաստաթղթեր: Զրուցակիցները ընդգծեցին, որ այդ ամուր պայմանագրային հենքը մշտապես թարմացվում և ընդլայնվում է: Այս ենթատեքստում քննարկվեցին նոր պայմանագրային փաթեթի նախապատրաստման աշխատանքները, որոնք նախատեսվում է ստորագրել բարձր մակարդակով առաջիկա հանդիպումների ընթացքում:
Բանակցությունների օրակարգում էին երկկողմ ռազմա-քաղաքական համագործակցությունը, արտաքին քաղաքական համադրումը, միջազգային կազմակերպություններում փոխգործակցությունը: Երկուստեք գոհունակություն հայտնվեց ՀՀ և ՌԴ արտաքին քաղաքական գերատեսչությունների միջև հաստատված արդյունավետ համագործակցության կապակցությամբ և պայմանավորվածություն ձեռք բերվեց լրամշակել և թարմացնել շուրջ քսան տարի առաջ ստորագրված միջգերատեսչական խորհրդատվությունների մասին արձանագրությունը:
Նախարարները քննարկեցին տնտեսական փոխգործակցության առավել խորացման նպատակով նախատեսվող ծրագրերը, անդրադարձան Դոնի Ռոստովում հայ-ռուսաստանյան միջկառավարական հանձնաժողովի աշխատանքներին, գոհունակությամբ նշվեց, որ անցյալ տարվա ինտենսիվ աշխատանքի արդյունքում արդեն գերազանցվել է առևտրաշրջանառության մինչճգնաժամային մակարդակը, և այս տարվա առաջին ամիսների տվյալները լավատեսություն են ներշնչում:
Էդվարդ Նալբանդյանն ու Սերգեյ Լավրովը, բարձր գնահատելով այս տարվա ապրիլին Երևանում կայացած հայ-ռուսաստանյան առաջին միջտարածաշրջանային ֆորումի արդյունքները, նշեցին ապակենտորնացված համագործակցության ընդլայնման և խորացման կարևորությունը:
Հայաստանի և Ռուսաստանի արտգործնախարարները անդրադարձան հումանիտար ոլորտում համագործակցության զարգացման հարցերին, պայմանավորվեցին այս բնագավառում համապարփակ համաձայնագրի մշակումն առաջիկայում ավարտելու վերաբերյալ:
Հանդիպման ընթացքում նախարարները մտքեր փոխանակեցին արցախյան հիմնահարցի կարգավորման գործընթացի վերաբերյալ: Այս ենթատեքստում Հայաստանի արտգործնախարարը երախտագիտություն հայտնեց բանակցային գործընթացում ՌԴ նախագահի կարևոր ներդրման և արտգործնախարարի կողմից ձեռնարկվող ջանքերի համար: Սերգեյ Լավրովը վերահաստատեց Ռուսաստանի դիրքորոշումը, առ այն, որ ղարաբաղյան հիմնախնդրի խաղաղ կարգավորումն այլընտրանք չունի:
Հայաստանի և Ռուսաստանի արտաքին քաղաքական գերատեսչությունների ղեկավարները հանգամանալից զրույց ունեցան միջազգային և տարածաշրջանային հարցերի շւորջ. Հյուսիսային Աֆրիկայում և Մերձավոր և Միջին Արևելքում տեղի ունեցող գործընթացների և զարգացումների վերաբերյալ:
Հանդիպումից հետո Էդվարդ Նալբանդյանն ու Սերգեյ Լավրովը ստորագրեցին 1995 թ. մարտի 16-ի «ՀՀ և ՌԴ միջև ՀՀ տարածքում ռուսաստանյան ռազմակայանի մասին» պայմանագրում փոփոխություններ կատարելու մասին թիվ 5 Արձանագրության վավերագրերի փոխանակման մասին արձանագրությունը և փոխանակեցին վավերարգրերը, որով այն մտավ ուժի մեջ:
Նախարարների հանդիպմանը հետևեց համատեղ մամուլի ասուլիս:
Օրվա երկրորդ կեսին Էդվարդ Նալբանդյանն այցելեց «Ինտերֆաքս» լրատվական գործակալություն, ուր հանդիպում ունեցավ Ռուսաստանի շուրջ երկու տասնյակ առաջատար լրատվամիջոցների ղեկավարների հետ, որոնց ներկայացրեց Հայաստանի արտաքին քաղաքականության առաջնահերթությունները:
Նախարար Նալբանդյանի մոսկովյան այցի օրակարգում էր նաև հանդիպումը հայկական համայնքային կազմակերպությունների ներկայացուցիչների հետ: Հանդիպմանը զրույց ՀՀ արտաքին քաղաքական խնդիրների և դրանց լուծման ուղղությամբ ձեռնարկվող քայլերի մասին: