Այսօրվա լրահոսում գերակշռում էին դատական համակարգում կայացված որոշումների վերաբերյալ նորությունները. մասնավորաբար՝ Մարտի 1-ի գործով քննչական խմբի ղեկավար Վահագն Հարությունյանի նկատմամբ կալանավորումը՝ որպես խափանման միջոց կիրառելու մասին քննիչի միջնորդությունը մերժվել է, ՌԴ-ն ԴԱՀԿ նախկին պետ Միհրան Պողոսյանին տվել է ժամանակավոր կեցության կարգավիճակ: Վերաքննիչ դատարանում մեկնարկել է նախկին նախագահ Ռոբերտ Քոչարյանի՝ անձեռնմխելիության հիմքով քրեական հետապնդումը չդադարեցնելու վերաբերյալ Առաջին ատյանի դատարանի որոշման դեմ բերված բողոքի քննությունը, ի դեպ դատավորն այսօր ինքնաբացարկ է հայտնել: Ինչպիսի՞ անակնկալներ են սրանք իշխանության համար: Անդրադառնալով «Առաջին լրատվական»-ի այս հարցին, «Իմ քայլը» խմբակցության քարտուղար Հակոբ Սիմիդյանը նշեց. «Մենք դատական իշխանությունների կամ դատավորների որոշումներից այլևս չենք զարմանում… Կարծում եմ՝ ճիշտ չի լինի, որ, որպես պատգամավոր, կոնկրետ գնահատականներ տամ, բայց սրանք դատական համակարգում տարիներով կուտակված խնդիրների արդյունք են, դատական իշխանությունը պետք է բարեփոխվի, լուծումն այդտեղ է»:
Վերջին օրերին դիտարկվում է հատկապես Մարտի 1-ի գործի կասեցման ռիսկը՝ Սահմանադրական դատարանի որոշումների ներքո: Իշխանության համար սա խնդի՞ր է, թե՞ ոչ. ի պատասխան այս հարցի՝ Հ. Սիմիդյանն ընդգծեց. «Վտանգ կա, որ այս գործընթացները կարող են խաթարել Մարտի 1-ի գործը: ՍԴ որոշմանը դեռևս ժամանակ կա, այսինքն՝ Առաջին ատյանի դատարանի՝ Ռ. Քոչարյանի խափանման միջոցը փոխելու վերաբերյալ որոշումը Վերաքննիչ դատարանում բողոքարկվել է, գործը նաև, կարծում եմ, Վճռաբեկ դատարան կգնա, այս գործընթացներից հետո նոր ՍԴ-ն այս հարցի վերաբերյալ որոշում կկայացնի»:
Հարցին, թե իշխանությունն ավելի վաղ կարո՞ղ էր ձեռնարկել անցումային արդարադատության անցումը, «Իմ քայլը» խմբակցության քարտուղարը պատասխանեց, որ այդ մասին արդեն 10 ամիս է խոսվում է, բայց իշխանությունը գործընթաց կարող էր սկսել խորհրդարանական ընտրություններից հետո միայն, և խորհրդարանական ընտրություններից հետո, իրականում, մեկնարկել է գործընթացը: «Իհարկե նմանատիպ երևույթները խթան են հանդիսանում, որ արագանա այս պրոցեսը: Նման երևույթներով ավելի ակնհայտ է դառնում դատական համակարգում առկա «հիվանդությունը» , և իշխանությունը բարեփոխումներ պետք է իրականացնի» ,- նշեց Հ. Սիմիդյանը՝ հավելելով նաև, որ այս գործընթացները արագացնում են վեթինգը, ինչը նաև հասարակական պահանջ է:
Մանրամասն՝ տեսանյութում: