Հայաստանի թատերական գործիչների միության նախագահ, բեմադրիչ Հակոբ Ղազանչյանն «Առաջին լրատվական»-ի հետ զրույցում անդրադառնալով դիտարկմանը, որ Երևանի թատրոնի և կինոյի պետական ինստիտուտում ռեկտորի ընտրություններն անցան բավականին թեժ և լարված մթնոլորտում, նշեց. «Ես չհասկացա՝ ինչու այդպես եղավ, ինչու այդպիսի պոռթկումներ եղան: Հիմնականում ավարտական կուրսի ուսանողներն էին, որոնք արդեն ավարտել են: Երբ որ վերլուծության եմ ենթարկում, տխուր եզրահանգումների եմ գալիս, թե ինչու եղավ, ով հրահրեց, ինչպես հանկարծ այս անհանգստությունն առաջացավ: Ինչքան հիշում եմ, սկսած Սոս Սարգսյանից՝ 4-5 ռեկտոր է նշանակվել, բոլորի ընտրություններն էլ եղել են առանց այլընտրանքային թեկնածուի: Այլընտրանքային թեկնածու չկար, որովհետև ով դիմել էր, փաստաթղթերը չէին համապատասխանում, Արամ Սուքիասյանը կարող էր լինել ռեալ մրցակից թեկնածու, բայց փաստաթղթերը հանձնելու ժամկետ կար, ուշացավ, այդ սահմանված ժամկետից հետո հաստատվեց նրա դոցենտությունը: Մրցույթը բաց էր, հայտարարված էր ժամանակին, բայց այնպես ստացվեց, որ ուրիշ մարդ չդիմեց: Ամեն դեպքում ռեկտորի ընտրությունները օրենքով անցան:… Կարծիքներ լսեցի, որ Լիլիթ Արզումանյանը կապ չունի թատերական աշխարհի հետ, պատահական մարդ է. դա անհեթեթություն է»:
«Ուսանողների գլխավոր խնդիրը, գլխավոր կռիվը պետք է լինի իրենց արվեստանոցի ղեկավարի, իրենց անմիջական դասախոսների հետ: Լինում են դեպքեր, երբ որ ուսանողը դիմում է գրում և տեղափոխվում ուրիշ արվեստանոց, ուրիշ վարպետի մոտ: Այսինքն՝ պետք է ստեղծագործական բնույթի խնդիրները հուզեն ուսանողին, ոչ թե վարչարարական»,- նշեց Հ. Ղազանչյանը:
Նա նաև ընդգծեց, որ չպետք է հիմք ընդունել, որ ուսանողը միշտ ճիշտ է. «Եթե մենք դա հիմք ընդունենք, կքանդենք ամեն ինչ: Անհավասար պայմաններում չի կարելի վերլուծել սա, նամանավանդ որ այն սկզբունքը, որով հիմա ձևավորվում է ուսանողական կազմը, այսինքն՝ ընդունելության համակարգը, ես կարծում եմ՝ հանացավոր է»:
Մանրամասն՝ տեսանյութում:
