Կանադայի Սուրեյ քաղաքի 58-ամյա բնակիչ Վիտո Խալասանը 2009 թվականին Ֆիլիպիններից տեղափոխվել է Կանադա՝ երազելով լավ կյանք ապահովել իր ընտանիքի համար: 10 տարի անց նա հնարավորություն է ստացել իրականացնելու իր երազանքը:
Իր ծննդյան օրվանից մի քանի օր անց Վիտո Խալասանը, որ հավաքարար է աշխատում դպրոցում, անսպասելի նվեր է ստացել ճակատագրից. նա իմացել է, որ վիճակախաղի տոմսով 7 մլն կանադական դոլար է շահել՝ հայտնում է PEOPLE-ը: 58-ամյա հավաքարարը վատ տեսողություն ունի, ուստի երկար նայում էր վիճակախաղի տոմսի թվերին և հրաժարվում էր հավատալ իր աչքերին. չէ որ դրանք համընկնում Էին շահող թվերին:
Հասարակ հավաքարարից նա միանգամից վերածվում է միլիոնատիրոջ: Վիտոն երեք երեխա ու չորս թոռ ունի, և վիճակախաղի տոմսեր էր գնում՝ երազելով բարեկեցիկ կյանք ապահովել նրանց համար: «Ես երազում եմ հնարավորություն ունենալ հոգ տանել իմ երեխաների մասին և նրանց ապագան ավելի լավը դարձնել: Այժմ մենք կկարողանանք լավ տուն գնել իմ զավակների ու թոռների համար»,- ասել է նա:
Բայց անակնկալ միլիոնները, ինչպես պարզվեց, բավարար չէին ձեռք բերվածով սահմանափակվելու համար: Վիտոն հայտարարել է, որ կշարունակի հավաքարար աշխատել, պարզապես կսկսի ավելի քիչ հերթափոխ վերցնել: Իր համար կարևոր է երեխաներին ավելի շատ տալ, և մի քանի միլիոն դոլարը սահման չէ:
