Ազգային ժողովում «Գովազդի մասին» օրենքում փոփոխություններ և լրացումներ կատարելու և «Հեռուստատեսության և ռադիոյի մասին» ՀՀ օրենքում փոփոխություններ և լրացումներ կատարելու մասին նախագծերի քննարկման ժամանակ հարակից զեկուցող, ՀՀԿ խմբակցության պատգամավոր Լևոն Մարտիրոսյանն ընդգծեց, որ ինչքան էլ ներկայացված օրենսդրական փոփոխությունները հակասական տպավորություն թողնեն, որոշ պատգամավորների մեջ կասկածներ կամ հետին մտքեր առաջացնեն, այդուհանդերձ, նախաձեռնողների նպատակները միանգամայն բարի են։
Մարտիրոսյանի խոսքով՝ իրենք փորձել են լուծումներ գտնել այն իրավիճակների համար, որում գտնվում է հեռուստատեսությունը։ «Հիմնական նպատակն այն է, որ աջակցենք մեր հեռուստաընկերություններին՝ լրացուցիչ ֆինանսական միջոցներ ստանալու և սեփական ֆինանսական ինքնաբավությունը որոշակի առումով ապահովելու համար, այլ նպատակ մենք չունենք»,-ասաց պատգամավորը՝ հավելելով, որ իր համար հասկանալի է՝ ալկոհոլի գովազդի մասին խոսելիս այն կարող է որոշակի կասկածներ առաջացնել, սակայն իրենք իրապես օգնելու նպատակ ունեն:
Ըստ պատգամավորի՝ հեռուստաընկերությունները շատ են, շուկան փոքր է, ուստի որոշակի լուծումներ պետք է գտնեին, իրենց այս նախաձեռնությունն էլ այդ լուծումն է:
Նա ընդգծեց, որ այս օրենսդրական փոփոխության արդյունքում կօգտվեն ոչ միայն հանրապետական հեռուստաընկերությունները, այլև մարզայինները, որոնք ֆինանսապես առավել բարդ վիճակում են ։ «Կոչ եմ անում իսկապես այստեղ դավադրություներ չփնտրել և կողմ քվեարկել օրինագծին»,- ասաց նա:
