Լոնդոնյան «Արսենալի» երկրպագուները խնդրագիր էին կազմել #BoycottBaku հեշթեգի ներքո և ստորագրահավաք սկսել՝ ընդդեմ Եվրոպայի լիգայի եզրափակիչ խաղը Բաքվում անցկացնելու ՈւԵՖԱ-ի որոշման: Սա, այդուհանդերձ, չխանգարեց, որպեսզի ՈւԵՖԱ-ն խաղը Բաքվում անցկացնելու որոշում կայացնի:
Տարիներ առաջ նմանատիպ իրողության է բախվել «Առաջին լրատվական»-ի հյուրը՝ Ազգային անվտանգության, միջազգային հարաբերությունների և հանրային կառավարման փորձագետ Սոսի Թաթիկյանը: 2004թ. նա աշխատում էր ՆԱՏՕ-ում, երբ ՆԱՏՕ-ն վերջին պահին չեղյալ հայտարարեց Բաքվում ՆԱՏՕ-ի «Գործընկերություն հանուն խաղաղության» ծրագրի շրջանակներում նախատեսված զորավարժությունները:
Անդրադառնալով հարցին, թե ինչու և ինչպես ՆԱՏՕ-ն հանգեց այս որոշմանը, արդյոք դա կապ ուներ Ադրբեջանի կողմից հայկական կողմի մասնակցությունը խոչընդոտելու հետ, թե ոչ, Սոսի Թաթիկյանը նշեց. «Այո՛, ՆԱՏՕ-ն այդ որոշմումը կայացրեց այն պատճառով, որ Ադրբեջանը ամիսներ շարունակ փորձում էր խոչընդոտել Հայաստանի մասնակցությունն այդ զորավարժություններին:
Այդ զորավարժության հրավերն ուղարկվել էր 2003թ. վերջին, հայկական կողմը, բոլոր կանոններին հետևելով, մասնակցության հայտ էր ներկայացրել: Զ որավարժությունը նախատեսված էր 2004թ. սեպտեմբերին, դրանից առաջ տեղի են ունենում նախազորավարժություններ, և Ադրբեջանը ջանքեր էր գործադրում, որպեսզի խանգարեր Հայաստանի ներկայացուցիչների մասնակցությանը: Նույնիսկ զորավարժությունից երեք օր առաջ Ադրբեջանի խորհրդարանը նամակ էր հղել ՆԱՏՕ-ի գլխավոր քարտուղարին՝ պահանջելով, որ Հայաստանի մասնակցությունը չեղյալ հայտարարվի: Դա չէր կարող ընդունվել ՆԱՏՕ-ի կողմից, քանի որ այդ դեպքում ՆԱՏՕ-ի հիմնարար սկզբունքներից մեկը՝ ներառականության սկզբունքը կխախտվեր…»:
Մանրամասն՝ տեսանյութում:
