ԱԺԲՀԿ խմբակցության պատգամավոր Լյովա Խաչատրյանը ԲՀԿ-ին «այլընտրանք» չիհամարում, այլ` ոչ իշխանական ուժ:
«Էդ բաժանումները դուք եք անում, ես նման բաժանում հասկացողություն չունեմ, ինձ համար երկու տեսակ կա` իշխանություն և ոչ իշխանություն, մենք բոլորս ոչ իշխանություն ենք, եթե պետք է` բացատրեմ` որն է իշխանությունը:
Մենք ոչ իշխանություն ենք, մի մասիս այլընտրանք կասեք, ընդդիմադիր կամ դիմադիր, դա էությունը չի փոխում, հասկանո6ւմ եք: Բառախաղերը մարդկանց թյուրիմացության մեջ գցելու համար են, ոչ թե` էությունը բացատրելու: Մենք ոչ իշխանական ուժ ենք, հասկանու՞մ եք»,- ասաց նա` հավելելով, որ իր համար անհասկանալի է` ինչ է նշանակում դիմություն-ընդդիմություն և այլն. կա իշխանություն, որը տնօրինում է բյուջեն, ատկատները, կաշառքները, վարկերը և այլն, և կա ոչ իշխանություն, որը հնարավորություն չունի ուղղակի ազդեցություն ունենալու ներքին և արտաքին քաղաքական գործընթացների վրա:
Խաչատրյանը նկատեց, որ իրենք խորհրդարանական չորս ուժերով համաձայն չեն այն ներքին տնտեսական քաղաքականության հետ, որը վարում է այս կառավարությունը, և այդ հենքի վրա իրենք միասնական են իրենց գործողություններում:
«Հիմա կասեք` որն է առաջնորդը, ինչ առաջնորդի մասին է խոսքը, ինչ ոչ առաջնորդի մասին: Կա մեկ այլ տեսակետ` տնտեսության կազմակերպման հետ կապված, որ կարելի էր այլ ձևով այս տնտեսությունը տնօրինել, որ չլինի ատկատ, որ ասենք, ՄԻՊ-ը չելնի, հայտարարի, որ ասենք թե՝ գնացուցակով են դատարանները որոշում ընդունում, որ Վերահսկիչ պալատը չասի, թե բյուջեի յոթանասուն տոկոսը գողանում են:
Ասում եմ` մենք ուզում ենք այնպես կառավարել, որ այս բացերը չլինեն երկրում, և կառավարենք երկիրը, սա է մեր տարբերությունը»,- ասաց նա:
Դիտարկմանը, թե` ԲՀԿ-ականներն իրենք են «այլընտրանք» համարում իրենց, ԲՀԿ-ական պատգամավորն արձագանքեց. «Դուք եք էդ անունը կպցրել, տենց էլ խոսակցությունն էթում ա, ի՞նչ ա նշանակում` այլընտրանք, ասում եմ` կա «իշխանություն», մենք «ոչ իշխանություն» ենք, ես այդպես եմ անվանում»:
Խաչատրյանը նշեց` ոչ իշխանություն են նաև մյուս երեք խորհրդարանական ուժերը, պարզապես իրենք իրենց ընդդիմություն են համարում, որովհետև կանոնակարգն է գուցե այդպես պահանջում, որպեսզի որոշակի արտոնություններ ունենան և ներկայացուցիչ ԵԱՀԿ-ում. դրանք տարբեր բաներ են:
«Սա կարծես թե ձևականորեն պարտադրված բան է, մենք ոչ պարտադրվող ենք, ոչ էլ դրա կարիքն ունենք»,- ասաց նա: Հետաքրքրվեցինք` եթե ԲՀԿ-ն «ոչ իշխանություն» է, իրենց առաջնորդ Գագիկ Ծառուկյանը պատրաստակա՞մ է արդյոք ստանձնել ոչ իշխանական ուժերին առաջնորդողի` լիդերի պաշտոնը:
«Ես չեմ լսել, որ Գագիկ Ծառուկյանը ցանկանում է ընդդիմադիր կամ ոչ իշխանական ուժերի առաջնորդ լինել, նա միշտ հայտարարել է` մենք այս ձևով այլևս տնտեսությունը կառավարելու իրավունք չունենք, այս կառավարությունը սխալ է կառավարում, տանում է տնտեսությունը կործանման և միշտ հայտարարում է` երբ տնտեսությունը զարգացնենք, երբ գցենք նորմալ ռելսերի վրա, նա հեռանալու է այս գործառույթներից, զբաղվելու է իր սիրած գործով:
Ինքը չի հավակնում որևէ լիդերության, ինքը` որպես հայ քաղաքացի, պատրաստ է համախմբել մյուս հայերին, որպեսզի էս տնտեսությանը օգնենք զարգանալու, սա է տեսակետը»,- ասաց նա:
ԲՀԿ-ական պատգամավորը նշեց` խոսում են բուրժուադեմոկրատական հեղափոխությունից, մինչդեռ այն մահացավ 20-րդ դարում` դարի հետ միասին, իսկ այսօր մարդիկ ուզում են ապրել օրենքներով և Սահմանադրությամբ։ Եթե ասում են` պիտի հէկ կառուցեն, իրենք ասում են` փաստաթղթերով պիտի լինի, ուսումնասիրություններ պիտի անեն, նոր կառուցեն:
«Եթե կենսամակարդակը կամ ՀՆԱ-ն պետք է ավելանա 7-8 տոկոս, չի ավելացել, բարի եղիր, տեղդ զիջիր էն մարդուն, ով կարող է էդ բանն անել, էս է մեր ցանկությունը, եթե չես կարողանում, վեց տարի անընդհատ ինչ-որ պատճառներ եք գտնում, վեց տարի կործանում եք. արտագաղթն ավելացրիք, աղքատությունն ավելացրիք, և այլն, ու դրանից հետո դեռ ասում եք` մեթոդ կա, պռոստո ղազ չկա, էդ անեկդոտն ա արդեն իրականում»,- ասաց նա:
Հարցին` Կառավարությանն անվստահություն հայտնելու հարցը շարունակո՞ւմ է մնալ ոչ իշխանական ուժերի օրակարգում, Խաչատրյանը պատասխանեց. «Ես կարծում եմ` օրակարգում է, կարծեմ` խորհրդարանական չորս խմբակցությունները քննարկում են ձևաչափը, հետագա քայլերը, դա պարզապես դեկլարատիվ խոսակցություն կամ հայտարարություն չէ»: ԲՀԿ-ական պատգամավորը նշեց` այդ հայտարարությունը նաև հետևող պայմաններ, պայմանավորվածություններ է իր մեջ ներառում, հավանաբար հենց այդ գործընթացն է ընթանում:
Խաչատրյանը կարծում է` եթե այսպես է շարունակվում, ապա այլընտրանք չունենք պարզապես: Իվանիշվիլի-Ծառուկյան համեմատականներից, ընդհանրություններից խոսել պատգամավորը չցանկացավ, միայն պատասխանեց. «Ես նախագահներին չեմ մեկնաբանում»:
