Լուրեր
Դատավորներ կան, որ իրավունք չունեին լինել դատավոր. սա ողբերգություն է

«ՀՀ-ին անհրաժեշտ է իրապես անկախ, ամուր դատական իշխանություն: Վիրահատական միջամտությամբ ոչ թե կոսմետիկ, այլ արմատական լուծումներ են տրվում. դատաիրավական համակարգի լայնածավալ բարեփոփոխումների միջոցով պետք է ձևավորել այնպիսի դատական իշխանություն, որը կվայելի ժողովրդի վստահությունը»,- «Առաջին լրատվական»-ի հետ զրույցում այս մասին ասաց ԱԺ «Իմ քայլը» խմբակցության պատգամավոր, Պետաիրավական հարցերի մշտական հանձնաժողովի նախագահ Վլադիմիր Վարդանյանը՝ հավելելով, որ դատական համակարգում կան նաև ազնիվ պրոֆեսիոնալ դատավորներ, որոնք ողջունում են բարեփոխման քայլերը, քանի որ դա միջոց է՝ առողջացնելու այդ համակարգը:

«Անկախ դատարանները պետք է անկախ լինեն ոչ միայն գործադիր և օրենսդիր մարմիններից, այլ նաև արտաքին ցանկացած միջամտությունից: Դատական իշխանության միակ հենարանը սեփական հեղինակությունն է»,- նշեց պատգամավորը:

Նրա խոսքով՝ ցանկացած դատավորի սահմանադրական իրավունքն է դիմել ՍԴ, և դրանից օգտվել է Ռ. Քոչարյանի գործը վարող դատավորը. «Այլ հարց է, թե նա օգտվել է, որովհետև իրոք կա վեճ, և սա լավագույն տարբերա՞կն է, թե՞ որովհետև ճնշման է ենթարկվել: Ժողովուրդը դատական համակարգի նկատմամբ վստահություն չունի:

Ամենամեծ խնդիրներից է այն, որ մեկ տարվա ընթացքում դատական համակարգը չփորձեց ինքնամաքրվել: Դատավորներ կան, որ իրավունք չունեին դատավոր լինելու. սա ողբերգություն է»,- նշեց Վլադիմիր Վարդանյանը՝ հավելելով, որ վեթինգը կիրառվել է շատ երկրներում, այն կարող է լինել դատական համակարգի առողջացման գործիքներից մեկը:

Մանրամասն՝ տեսանյութում:

  • Դիտումներ՝ *