Չինաստանում «Հարյուրամյա ձվեր» ավանդական ճաշատեսակ արտադրող ընկերությունը պահանջել է ամերիկյան CNN ընկերությունից ներողություն խնդրել այն բանի համար, որ իրենց այս ճաշատեսակն անվանել են «աշխարհի ամենատհաճ ուտելիքը»: Այս մասին գրում է The Shanghai Daily գործակալությունը:
«Հարյուրամյա ձվերը» (չինարեն «պիդան») իրենցից ներկայացնում են կրի մեջ կոնսերվացված ձվեր: Պատրաստման ժամանակ օգտագործվում է քացախ, աղ, համեմունքներ: Ձվերը դառնում են թափանցիկ և ունենում են յուրահատուկ համ: CNN-ի այն պնդումները, որ այս ճաշատեսակը լավ տեսք չունի և վատ հոտ ունի, չինացիների մոտ զայրույթ է առաջացրել:
Վերոնշյալ ձվերի խոշորագույն արտադրող «Խուբեյ Շենդան» ընկերությունը որոշել է բողոքի հայց ներկայացնել ամերիկյան ընկերությանը, որպեսզի ներողություն խնդրի և հերքի իր ասածները:
«CNN-ի տեսանյութը հիմնված է այն մարդկանց ասածների վրա, որոնք անգամ տվյալ ճաշատեսակից օգտվողներ չեն, և, ակնհայտ է, որ իր հիմքում չունի գիտական հիմնավորում: Արված եզրակացությունը խոսում է տգիտության, ինչպես նաև այլ երկրների ավանդույթների հանդեպ հարգանքի բացակայության մասին»,- ասված է հայցի մեկնաբանության մեջ:
Ընկերությունում նշում են, որ «հարյուրամյա ձվերում» խոլեստերինը 20%-ով ավելի քիչ է, քան թարմ ձվերում, այս իսկ պատճառով այն ավելի օգտակար է: Թե որ դատարան է ուղարկվել հայցը, չի հայտնվում: Ասվում է միայն այն մասին, որ այն ուղարկվել է ընկերության տնօրենների խորհրդի ղեկավարի, ինչպես նաև 3000 աշխատակիցների կողմից:
