ՀՀ փոխարտգործնախարար Շավարշ Քոչարյանը շաբաթ օրը կառավարության մամուլի կենտրոնում հայտարարել էր, որ Հայաստանը շարունակելու է իր հարաբերությունները Ուկրաինայի հետ՝ անկախ ուկրաինացի ժողովրդի ընտրությունից:
«Մենք համարում ենք, որ անկախ Ուկրաինայի ընտրությունից՝մենք մերհարաբերությունները շարունակելու ենք։Սա է մեր դիրքորոշումը։ Այսինքն՝խնդիրն այն չէ, որ մենք ընդհատել ենք և նորից պիտի սկսենք։Ո՛չ, դա Ուկրաինայի ընտրությունն է, և անկախ ընտրությունից՝ մեր հարաբերությունները շարունակելու ենք»,- «Ազատություն» ռ/կ-ին ասել էր նա:
Շավարշ Քոչարյանը նաև շեշտել էր, որ ՀՀ շահերից է բխում շարունակել Ուկրաինայի հետ համագործակցությունը, հարաբերությունները բոլոր ոլորտներում։
«Մենք ունենք միջ կառավարական հանձնաժողով, ուղղակի այս իրավիճակը կարող է ինչ-որ չափով հետաձգվել… բայց ոչ մեր պատճառով, այլ բուն Ուկրաինան այսօր պատրաստ չէ, որովհետև նորից է ձևավորվում գործադիր իշխանությունը, մայիսին տեղի կունենան ընտրություններ։ Ինչ-որ հարցեր կան, որոնք կհետաձգվեն, բայց ոչ թե պայմանավորված Հայաստանի դիրքորոշմամբ, այլ Ուկրաինայի ներքին իրավիճակով»,- ասել էր պաշտոնյան:
Հարցի առնչությամբ «Առաջին լրատվական»-ը զրուցեց նաև ԱԺ նախկին նախագահ Տիգրան Թորոսյանի հետ, ով նկատեց՝ ճիշտ չէ, որ Ուկրաինայի նոր իշխանություններին ճանաչել-չճանաչելու հարցում Հայաստանը շտապի մասնակցություն ունենալ, և եթե ՀՀ արտաքին գերատեսչությունը կարողանա նպաստել այդ երկրում առկա իրավիճակի կարգավորմանը, դա շատ ավելի օգտակար ու արդյունավետ կլինի:
«Բռնել մեկի կամ մյուսի կողմը, կարծում եմ, իմաստ չունի: Խնդիրը չափազանց նուրբ է: Ուկրաինայում իրավիճակը բավականին բարդ է, և կարևորն այն է, որ այն ավելի չսրվի, որ երկիրը մասերի չբաժանվի: Պետք է կարողանալ մարել այն կայծը, որ բռնկվել է այդ երկրում՝ թույլ չտալով, որ այն վերածվի հրդեհի:Տարբեր, այդ թվում՝ ազդեցիկ երկրները պետք է կարողանան ստեղծված վիճակից լավ լուծում գտնել՝ պահպանելու Ուկրաինայի տարածքային ամբողջականությունն ու ապահովելու նրա հետագա օրինական ընթացքը:
Ցավոք, Ուկրաինան մեկ անգամ արդեն այս ճանապարհով անցել է, երբ իշխանության էր գալիս Վիկտոր Յուշչենկոն: Ես շատ լավ եմ հիշում, որ նրա իշխանության գալը բերեց նաև ոչ օրինական ու ոչ սահմանադրական քայլեր»,- ասաց Տիգրան Թորոսյանը:
Խորհրդարանի նախկին խոսնակի խոսքով՝ այն իշխանությունը, որ այսօր կա Ուկրաինայում, դեռևս ժողովրդավարական ճանապարհով ընտրված իշխանություն չէ:
«Ինչ վերաբերումէ Վիկտոր Յանուկովիչին, ապա նրա քայլերը երկրի մասին մտածող ղեկավարի քայլեր չեն»,-ասաց Տիգրան Թորոսյանը՝ նկատելով, որ ուկրաինական իրադարձությունների նշանակությունը շատ մեծ է ոչ միայն Ուկրաինայի համար, այլև ընդհանրապես միջազգային ասպարեզում:
«Այս առումով ամենամեծ ուշադրությանն արժանի է Գերմանիայի կանցլեր Անգելա Մերկելի դիրքորոշումը, թե՝ Ուկրաինայի պարագայում պետք է չափազանց զգույշ լինել, քանի որ ցանկացած էական տեղաշարժ՝ աջ կամ ձախ, մի կողմի համար կարող է ընկալվել հաղթանակ, մյուսի համար՝ պարտություն: Իսկ սա կարող է իսկապես կործանարար լինել և Ուկրաինայի, և ԱՄՆ-ի, և Ռուսաստանի համար: Ի վերջո՝ գաղտնիք չէ, որ այս ամենը պետք է դիտարկել նոր աշխարհակարգի հաստատման քայլերի շրջանակում: Այս տեսակետից խնդիրն այն չէ՝ Հայաստանը պե՞տք է ճանաչի Ուկրաինայում ներկայումս իշխանություն ունեցողներին, թե՞շարունակի ճանաչել Վիկտոր Յանուկովիչի լիազորությունները»,- ասաց նախկին պաշտոնյան:
Լուսանկարը՝ Photolure-ի
