Շենգավիթ վարչական շրջանի ընդհանուր իրավասության դատարանում Ալեքսանդր Ազարյանի նախագահությամբ սկսվելու է Էդգար Մելքոնյանի գործի դատական քննությունը:
30-ամյա Էդգար Մելքոնյանը ոստիկանության Շենգավիթի բաժնի համայնքային ոստիկանության բաժանմունքի տեսուչ է եղել ու, ըստ մեղադրանքի, չի կատարել իր ծառայողական պարտականությունները, կազմել է իրավաբանական նշանակություն ունեցող կեղծ փաստաթղթեր:
Իրադարձությունները ծավալվել են հետևյալ կերպ:
2013 թվականի հուլիսի 4-ին Երևանի թիվ 7 փոստային բաժանմունքում Երևանի բնակիչ Գառնիկ Չոբանյանը հավաքված մարդկանց միջից դուրս գալու ժամանակ հրել ու գետնին է գցել Լիդա Կաթրջյանին, ինչի հետևանքով վերջինս կոնքազդրի կոտրվածքի ձևով ստացել է առողջությանը միջին ծանրության վնաս պատճառած մարմնական վնասվածք:
Վնասվածք ստացած կնոջը տեղափոխել են «Արմենիա» բժշկական կենտրոն:
Նույն օրը ոստիկանության Շենգավիթի բաժնում «Արմենիա» բժշկական կենտրոնից ահազանգ է ստացվել, որ աջ ազդրոսկրի վզիկի փակ կոտրվածքով հիվանդանոց է տեղափոխվել Լ. Կաթրջյանը:
Ահազանգը գրանցվել է, ստացված տեղեկության ստուգումը հանձնարարվել տեսուչ Էդգար Մելքոնյանին:
Տեսուչը, սակայն, հանցագործության հատկանիշներ հայտնաբերելու կամ դրանց բացակայությունը պարզելու համար անհրաժեշտ ստուգումներ անցկացնելու իր պաշտոնեական պարտականությունները չի կատարել, չի ցանկացել ժամանակ ու միջոցներ ծախսել այս գործի վրա:
Չկատարելով համապատասխան հրահանգի պահանջները՝ տեսուչը չի մեկնել դեպքի վայր, հետքերի պահպանման ուղղությամբ միջոցներ չի ձեռնարկել, դատաբժշկական փորձաքննություն չի նշանակել, բացատրություններ չի վերցրել, անհրաժեշտ այլ գործողություններ չի կատարել:
Ըստ մեղադրանքի՝ քրեական օրենսգրքով չթույլատրված արարքի հետևանքով անմիջականորեն ֆիզիկական վնաս ստացած Լիդա Կաթրջյանը տևական ժամանակ զրկվել է քրեական դատավարության օրենսգրքով սահմանված՝ տուժողի իրավունքներից օգտվելու հնարավորությունից:
Էդգար Մելքոնյանի կողմից թույլ տրված անօրինությունները շարունակվել են:
Քաղաքացուհու մարմնական վնասվածքների վերաբերյալ ստացված տեղեկությունը ամբողջական ու սահմանված կարգով ստուգելու պատրանք ստեղծելու, այդ կերպ իր պաշտոնեական դիրքի չարաշահումը թաքցնելու անձնական դրդումներով Էդգար Մելքոնյանը կազմել է իրավաբանական նշանակություն ունեցող փաստեր ու իրադարձություններ հավաստող, պաշտոնական համարվող կեղծ փաստաթղթեր:
Մասնավորապես՝ «Արմենիա» բժշկական կենտրոնի կրիմինալ մատյանի զննության մասին 2013 թվականի հուլիսի 4-ի արձանագրությունը, տուժած կնոջից բացատրություն վերցնելու մասին հուլիսի 5-ի արձանագրությունը, Ալիսա Հ.-ից բացատրություն վերցնելու մասին հուլիսի 6-ի արձանագրությունը, որոնցում ամբողջությամբ կեղծ տեղեկություններ է մտցրել, իբր՝ բժշկական կենտրոնում Լիդա Կաթրջյանը հայտարարել է, թե մարմնական վնասվածքն ստացել է Գ. Նժդեհի փողոցում գտնվող փոստում սայթաքելու և վայր ընկնելու հետևանքով, իբր՝ Կաթրջյանն իր բացատրության մեջ հայտնել է, թե վնասվածքը ստացել է ոտքերը թուլանալու և վայր ընկնելու հետևանքով, իբր՝ Ալիսա Հ.-ն Կաթրջյանի դուստրն է ու հաստատում է մոր կողմից մարմնական վնասվածքն ընկնելու հետևանքով ստանալու հանգամանքը:
Այնուհետև Էդգար Մելքոնյանը կազմել է «Արմենիա» բժշկական կենտրոնից ստացված ահազանգով ստեղծված նյութերի փաստերի ստուգման արդյունքների վերաբերյալ հուլիսի 7-ի կեղծ եզրակացությունը, որում կեղծ տեղեկություններ է մտցրել, թե կատարված ստուգմամբ պարզել է, որ Կաթրջյանը վնասվածքն ստացել է իր անզգուշության պատճառով:
Դրա հիման վրա էլ նյութերը հանցագործության հատկանիշների բացակայության հիմքով կցվել են ոստիկանության բաժնի համապատասխան մատյանին առընթեր թղթապանակին:
«Ստեղծագործական» մտքով օժտված ու «վիպասանական հակումներ» ունեցող տեսուչին մեղադրանք է առաջադրվել ՀՀ քրեական օրենսգրքի 308 հոդվածով և 314 հոդվածի 1-ին մասով:
Մելքոնյանի խափանման միջոցը ստորագրությունն է չհեռանալու մասին:
