Ռուսաստանի ներքին գործերի նախարարության ներքին անվտանգության վարչության աշխատակիցները մեծածավալ հատուկ օպերացիայի շնորհիվ հայտնաբերել են մոտ երեք տասնյակ բանդաներ, որոնք զբաղվել են մեքենաների առևանգմամբ: Նրանցից 12-ում ներգրավված են եղել ոստիկաններ: Այս մասին հաղորդում է RIA-Novosti գործակալությունը:
«Այս օպերացիան իրականացվել է մի քանի ամիսների ընթացքում միաժամանակ մի քանի շրջաններում: Ընդհանուր առմամբ, հայտնաբերվել է 160 ոստիկան, որոնք այս կամ այն կերպ կապված են եղել այս հանցավոր բիզնեսի հետ: Նրանց մեջ են ոստիկանության 7 բարձրաստիճան պաշտոնյաներ»,- ասել է ՌԴ ՆԳՆ ներքին անվտանգության վարչության ղեկավար Յուրի Դրագունցովը:
Նրա խոսքերով՝ հայտնաբերվել է 30 բանդա, որոնք մասնագիտացած էին մեքենաների առևանգման գործում, 12-ում եղել են ոստիկաններ: Նա պատմել է, որ ոստիկաններն օգնել են հանցագործներին առանց արգելքի առևանգել մեքենաները, լսել են ռադիոկապը, հսկել են ոստիկանական պարեկային մեքենաների տեղաշարժը, այնուհետև վերահսկել են ավտոմեքենաների օրինականացման գործընթացը:
