Լյուքսեմբուրգի նախկին վարչապետ Ժան Կլոդ Յունկերը Եվրոպական ժողովրդական կուսակցությունից դարձել է Եվրահանձնաժողովի ղեկավարի պաշտոնի թեկնածու: Նա հավաքել է առավել մեծ թվով ձայներ՝ Դուբլինում Եվրախորհրդարանի ամենամեծ թվով անդամներն ունեցող կուսակցության համագումարի ժամանակ: Այս մասին հայտնում է ITAR-TASS-ը:
Նրա մրցակիցն էր եվրահանձնակատար Միշել Բարնիեն: Նախկինում ցուցակում ընդգրկված Լատվիայի նախկին վարչապետ Վալդիս Դոմբրովսկիսը համագումարի աշխատանքի ժամանակ հանել էր թեկնածությունը:
Յունկերի օգտին են քվեարկել համագումարի 382 մասնակիցներ, իսկ Բարնիեի օգտին՝ 245 մասնակիցներ:
«Ցանկանում եմ, որպեսզի Եվրոպան մնա մայրցամաք, որում իշխում է խաղաղությունը»,- հաղթանակից անմիջապես հետո հայտարարել է Ժան Կլոդ Յունկերը:
Եվրահանձնաժողովի ներկայիս ղեկավար Ժոզե Մանուել Բարոզուն պաշտոնից կհեռանա մայիսին՝ Եվրախորհրդարանի նոր կազմի ընտրվելուց հետո: Փորձագետները կարծում են, որ Յունկերը մեծ շանսեր ունի դառնալու Եվրահանձնաժողովի նախագահ մինչև 2019-ի գարուն:
Եվրահանձնաժողովի նոր ղեկավարին նշանակում է ԵՄ գագաթնաժողովն ու նրա թեկնածությունն ուղարկում Եվրախորհրդարանի հաստատմանը:
