Այսօրվանից Բրյուսելում մեկնարկել է Արևելյան գործընկերության երկրների ղեկավարների մասնակցությամբ բարձր մակարդակի խորհրդաժողովը: Եվրամիության հանդիպմանն ընդառաջ հանդիսավոր հռչակագիր էր պատրաստվել, որ անդամ երկրները պետք է մասնակցեին, սակայն Ադրբեջանը չի ստորագրել՝ պատճառաբանելով, որ այնտեղ Ադրբեջանի տարածքային ամբողջականության մասին կետ չկա: Ի՞նչ է ստացվում. Ադրբեջանն ակնկալում է, որ բոլոր անդամ երկրները Արցախի հարցում ադրբեջանական կողմի դիրքորոշո՞ւմը պետք է պաշտպանեն: Ի պատասխան «Առաջին լրատվական»-ի այս դիտարկում-հարցին՝ քաղաքագետ Գրետա Ավետիսյանը ասաց. «Ըստ էության՝ այս հռչակագիրը ընդհանրապես որևէ երկրի կողմից այդպես էլ չստորագրվեց, և դա դարձավ ընդամենը Մոգերինիի հայտարարություն, իսկ Ադրբեջանի քաղաքականությունը բոլորիս էլ պարզ է և հստակ, և դա շարունակվող քաղաքականություն է, որ միջազգային ցանկացած հարթակում փորձում է իր դորքորոշումը առաջ տանել: Այստեղ զարմանալու որևէ առիթ չկա. այսինքն՝ Ադրբեջանը փորձեց կրկին իր դիրքորոշումը ներկայացնել, սակայն ԵՄ ղեկավարությունը հասկանում է, որ սա խնդրահարույց, «նյուանսային» հարց է, փորձեց շրջանցել և ավելի ընդհանրական՝ ԵՄ և ԱլԳ շրջանակներում ձևակերպումներ ներկայացնել»:
Ակնկալվում էր, որ Բրյուսելում կստորագրվի ԵՄ-Ադրբեջան համաձայնագիրը՝ ՍԵՊԱ-ի օրինակով, սակայն չստորագրվեց: Այս կապակցությամբ ԱԺ «Իմ քայլը» խմբակցության պատգամավոր Սոս Ավետիսյանը նշեց. «ՍԵՊԱ-ում ամրագրվել, մասնավորապես միջազգային իրավունքի երեք սկզբունքների մասին, և այդ հարցը այդ ձևաչափով պետք է դիտարկվի, նաև՝ Մինսկի խմբի բանակցությունների ձևաչափը: Այստեղ ակնկալիքը շատ հստակ պետք է լինի, որ հակամարտության բոլոր կողմերի համար ձևակերպումները պետք է համահավասար լինեն, ընկալելի լինեն»: «Կարծում եմ, որ այն հանգամանքը, որ Ադրբեջանին չհաջողվեց ստորագրել տալ մի հռչակագիր, որտեղ տարածքային ամբողջականությունն էր ֆիքսում, գուցե հուշում է, որ այդպիսի միակողմանի միտումներ թույլ չեն տա եվրոպական մեր գործընկերները»,- հավելեց նա:
Մանրամասները՝ տեսանյութում։