ԱԺ գյուղատնտեսական և բնապահպանական հարցերի մշտական հանձնաժողովի մարտի 6-ին անցկացված խորհրդարանական լսումներից հետո՝ ամփոփիչ ելույթի ժամանակ, ԱԺ նախագահ Հովիկ Աբրահամյանը նշեց, որ քննարկումների արդյունքում այն տպավորությունն է ստացել, թե վիճակն այնքան էլ վատ չէ, բայց երբ գնում է գյուղեր, այդ մոտեցումը չկա, չնայած՝ կարելի է արձանագրել, որ դժգոհությունները պակասել են:
«Իհարկե, խնդիրներ կան, որոնք շատ հեշտ կարող են լուծվել: Մենք անելիքներ ունենք, որոնց համար ֆինանսական ռեսուրսներ են անհրաժեշտ, դա ակնհայտ է: Բոլորս պետք է հասկանանք՝ կախարդական փայտիկ չկա, որ բոլոր հարցերը միանգամից լուծենք: Այն, որ պետք է արձանագրենք՝ գյուղատնտեսությունը շատ կարևոր է մեր երկրի համար, ակնհայտ է, պետք է գյուղը ոտքի կանգնի, պետք է գյուղացուն օգնենք, որ ոտքի կանգնի»,- ասաց նա՝ հավելելով, որ ամեն ինչ պետք է անել՝ ստեղծել հնարավորություններ, էժան տոկոսով, երկարաժամկետ վարկեր տրամադրել:
Աբրահամյանի համոզմամբ՝ գյուղատնտեսական վարկը չի կարող լինել յոթ տարուց պակաս, դա չի կարող շահույթ տալ, իսկ յուրաքանչյուր բիզնեսի հիմքում պետք է ընկած լինի շահույթը, որպեսզի այն գոյատևի, ունենա շարունակական բնույթ: Աբրահամյանը կոչ արեց բոլորին լինել հետևողական իրենց խոստումների մեջ. չի կարելի գնալ գյուղ, խոստումներ տալ ու չկատարել:
Լսումների ավարտին լրագրողները հետաքրքրվեցին՝ արդյոք ինչո՞ւ էր սպառնում Հովիկ Աբրահամյանը: (Լսումների ժամանակ ԱԺ նախագահն իրեն բարձր տոնով դիմած քաղաքացուն ասել էր, որ այդպես չխոսի, չմոռանա՝ նրա կենսագրությունն ինքը լավ գիտի): «Ձեր մտահոգությունն իմ մտադրություն մի հաշվեք, էլի, ես էդպես բան չունեմ՝ մարդուն սպառնալ, ես նույնիսկ ԱԺ-ում, տեսնում եք, որ մարդիկ ինձ սպառնում են, ես շատ ուրախ, զվարթ պատասխանում եմ: Ես չէի կարող կրակի վրա բենզին լցնել, սիրելիս: Գյուղացին ոնց կարող ա գյուղնախարարին ասի՝ ստում ես, տենց բան ո՞նց կարելի ա ասել: Համաձայն եմ, հասկանում եմ իրենց վրդովմունքը, եթե սերմը որակով չի՝ պիտի փոխատուցենք, ինչի՞ մասին է խոսքը, բայց որոշ մարդիկ որ չեն հասկանում իրավիճակը և ինձ մեղադրում են, ես չեմ կարող ընենց անեմ, որ մարդիկ իրար հետ կռվեն։ Դա ի՞նչ է տալու, եթե դա որոշ մարդկանց ձեռագիրն է, ապա ես նման պահվածք չունեմ, ընդհակառակը, պիտի միշտ համերաշխություն ստեղծենք, հանդուրժողականություն ստեղծենք: Մարդը իրոք վիրավորված է, ես հասկանում եմ, եթե իմ տունը, որևէ մեկի տունը նա գրավ դնի, և բանկը տանի, դա պրոբլեմ է, այո, ինչի մասին է խոսքը, բայց չի կարելի հարցը թողնել անհետևանք»,- ասաց նա:
Լրագրողները պնդեցին, որ Աբրահամյանն ամեն դեպքում վիրավորել է ֆերմերին, սակայն ԱԺ նախագահը չհամաձայնեց, նշեց, որ լրագրողները կարծում էին՝ ինքը պիտի ոչ միայն ասեր՝ արի, նախարարի վրա գոռա, այլև ասեր՝ մի հատ էլ խփի: Նկատելով իրենից քիչ հեռու կանգնած ֆերմերին՝ Ռաֆիկ Պողոսյանին, ԱԺ նախագահը կատակով կանչեց նրան. «Արի ստեղ հլը, բերանդ բացել, կանգնել ես, այ ժուլիկ: Չե՞ս կարում՝ դու քո հարցը նորմալ ձևակերպես, դժգոհ եղել ե՞ս ինձնից: Ես որևէ մեկին ահաբեկե՞լ եմ», ապա ստանալով ժխտական պատասխան՝ դիմեց իրեն հանդիմանող լրագրողին. «Դե ներողություն խնդրիր»։ Դիտարկմանը, թե՝ բոլորի ներկայությամբ վախից է հերքում, ԱԺ նախագահը պատասխանեց. «Ոնց կասի՝ ոչ, բա կարող ա՞՝ ինձանից վախենում է, լսել ենք, ինչո՞ւ պետք է ներողություն խնդրի, ես չուզեցի, որ գյուղնախարարի ու իրա մեջ լարվածություն լինի»,- ասաց նա:
Ագրարագյուղացիական միավորման նախագահ Հրաչ Բերբերյանը, ԱԺ նախագահին դիմելով, ասաց, որ օրենքներ են խախտվել, նա պատասխանեց. «Հրաչ, դու չգիտես՝ ինչ է եղել, հլա մի րոպե թող ինքն ասի։ Հլա ձեռքերդ գրպանիցդ հանի, պատճառն ինչ ա, Հրաչ, պատճառը…»: Բերբերյանի հարցին՝ հստակ ասի արդյո՞ք, Աբրահամյանը հորդորեց հստակ, ճիշտ, ազնիվ ասել: «Մենք էս մարդկանց ի՞նչ ունենք խաբելու»,- ասաց նա: Ի վերջո, Աբրահամյանը Բերբերյանի հետ պայմանավորվեց առանձին հանդիպել և քննարկել այս հարցը, լուծումներ գտնել:
