Մայիսի 7-ին Երևանում տեղի ունեցավ Հայաստան-ԱՄՆ ռազմավարական երկխոսության նիստը: Երկխոսության նիստի ավարտին ստորագրվեց երկու կարևոր փաստաթուղթ. ի՞նչ նշանակություն կունենան այդ փաստաթղթրը հայ-ամերիկյան հարաբերությունների զարգացման դինամիկայի վրա և, առհասարակ, Հայաստանի համար: «Առաջին լրատվական»-ի այս հարցին ի պատասխան՝ միջազգայնագետ Սուրեն Սարգսյանը մասնավորապես ասաց. «Հայ-ամերիկյան հարաբերություններն այս պահին գտնվում են բավականին ցածր մակարդակի վրա, որովհետև ինչ մենք ունենք այսօր, բացարձակապես որևէ կերպ չի արտացոլում այն հնարավորություններն ու այն պոտենցիալը, որ մեր երկու պետությունների միջև կա՝ այդ թվում հաշվի առնելով նաև համայնքի կարևոր գործոնը:
Մշտապես կա պնդում, որ մի սանդղակ կա, որից ցածր հայ-ամերիկյան հարաբերությունները լինել չեն կարող, բայց ես նաև պնդում եմ, որ մի սանդղակ էլ կա, որից բարձր էլ լինել չեն կարող՝ հաշվի առնելով Հայաստանի արտաքին քաղաքական ուղենիշները, մեր տարածաշրջանում Միացյալ Նահանգների հետաքրքրությունները, մեր նկատմամբ հետաքրքրությունը կամ դրա համարյա բացակայությունը:
Ինչ վերաբերում է կոնկրետ այս փաստաթղերթին, ապա, իհարկե, նման փաստաթղթերի ստորագրումը կարևոր է հարաբերությունների խորացման համար, մանավանդ որ այստեղ խոսվում է նաև ֆինանսական աջակցության մասին, քանի որ այս փաստաթղթերով նաև մի փոքր ֆինանսական աջակցություն է նախատեսվում»:
«Եթե մենք խոսում ենք ռազմավարական նշանակությունների մասին, ապա Վրաստանն ու Ադրբեջանը Միացյալ Նահանգների համար ռազմավարական պետություններ են, և այդ բառերն օգտագործել է Ջոն Բոլթոնը՝ տարածաշրջանային այցի ժամանակ, իսկ Հայաստանը բավարարվել է ընդամենը ռազմավարական երկխոսությամբ: Եվ Ջոն Բոլթոնի խոսքերով էր նաև՝ Հայաստանը Միացյալ Նահանգների համար «կարևոր առաջնահերթություն ունեցող երկիր»: Դա շատ բաց տեքստով ձևակերպում է, և Թրամփի վարչակազմը բոլոր նախորդ վարչակազմերից, ում հետ մենք գործ ենք ունեցել, տարբերվում է հենց պրագմատիզմով և իրերն իրենց անուններով կոչելու ունակությամբ»,- հավելեց միջազգայնագետը:
Մանրամասները՝ տեսանյութում։