Ինչպես հայտնում է Spiegel-ը, Բավարիայում փող փոխադրող ինկասատորները ճանապարհին կորցրել են երեք պայուսակ, որի մեջ ընդհանուր առմամբ եղել է 1 մլն եվրո: Նախնական տվյալներով՝ ընթացքի ժամանակ մեքենայի դռները հանկարծակի բացվել են և գումարն ընկել է ճանապարհին:
Միջադեպը տեղի է ունեցել երկուշաբթի օրը՝ հուլիսի 4-ին: Վաղ առավոտյան ինկասատոր մեքենան դուրս է եկել Օբերտուլբա քաղաքից և A7 ավտոմայրուղով շարժվել է հարավ: Շուտով մեքենայի մեջ ազդանշան է միացել, որ դռներից մեկը բաց է: Համելբուրգի մոտակայքում՝ սկզբնակետից 20 կմ հեռավորության վրա, մեքենան շրջվել և ետ է գնացել:
Սկզբում ինկասատորները կարծում էին, թե կորցրել են մեկ պայուսակ, սակայն հետագայում պարզվել է, որ բաց դռնից երեք պայուսակ է ընկել: Մանրակրկիտ որոնողական միջոցառումները, որին միացել է նաև ոստիկանությունը, հաջողությամբ չեն պսակվել: 40×40 սմ չափեր ունեցող պայուսակները հայտնաբերել չի հաջողվել:
Իրավապահ մարմինները դիմել են անցորդներին, որոնք հնարավոր է՝ տեսել են ինկասատորի մեքենան կամ նրանց, ովքեր գտել են պայուսակները:
Միևնույն ժամանակ, բավարական քրեական ոստիկանությունը քննություն է սկսել երկու ինկասատորների նկատմամբ: Ոստիկանության մամլո ծառայության աշխատակից Կարլ Հայնց Շմիդտը չի բացառում տեղի ունեցածի քրեական բնույթը:
