«Ընդդեմ իրավական կամայականությունների» ՀԿ նախագահ Լարիսա Ալավերդյանն այսօր Ուկրաինայում կատարվող զարգացումների շուրջ քննարկման ժամանակ այնպիսի տեսակետ հայտնեց, որ հերթական անգամ իրավունքը տանուլ է տալիս քաղաքականությանը և դա ամենատխուր դասն է, որը պետք է քաղենք. «Այսօր ոչ թե էթնիկական, էթոնոքաղաքական, այլ աշխարհաքաղաքական ճգնաժամի երևույթներ ենք տեսնում»:
Նրա դիտարկմամբ՝ մենք ավելի շատ գիտենք Ռուսաստանի և դրա սխալների մասին, քան Արևմուտքի մասին. « Այն նույն ուժերը, որ դատապարտում են Ռուսաստանին, արդյո՞ք դատապարտել են ԱՄՆ-ի քաղաքականությունը, որը 5-6 անգամ մտել է օվկիանոսից այն կողմ գտնվող երկրները»:
Եվրոպայի կեցվածքից նա ավելի շատ վրդովված է մասնավորապես հայաստանյան ժողովրդավարական շարժումների և քայլերի հանդեպ համարժեք կեցվածք չցուցաբերելու համար: Նրա կարծիքով՝ Արևմուտքի անտարբերության արդյունքում տապալվեցին բոլոր այն քայլերը, որոնք քաղաքացիական հասարակությունը ձեռնարկում էր գոնե արժանապատիվ ընտրություններ անցկացնելու համար:
Բացի այդ, նա հավատացած է, որ մինչև Հայաստանում արժանապատիվ քաղաքական ուժ կամ իշխանություն չունենանք, միշտ մնալու ենք կողքից նայողի դերում և սա ավելի մեծ մարտահրավեր է, քան զուտ Ռուսաստանի նկրտումներից ազատ մնալը:
Ինչ վերաբերում է Ուկրաինային, ապա նա համոզված չէ, որ այսուհետ Ուկրաինայի ժողովուրդը վատ չի ապրելու և ծանր օրեր չի ունենալու. «Մենք պետք է հստակեցնենք, որ Յանուկովիչը դե յուրե լեգիտիմ է ընտրվել, բայց դե ֆակտո կորցրել է լեգիտիմությունը: Մեզ մոտ դա էլ չկա, այդ լեգիտիմ իշխանություններին կարոտ մնացինք, այս առումով չեմ կարծում, որ մեր, կամ Ուկրաինայի վիճակն ինչ-որ բանով նման է»:
