News Georgia-ի փոխանցմամբ՝ Վրաստանի պատրիարք Իլյա 2-րդը Վրաստանի խորհրդարանին կոչ է անում հետաձգել Քաղաքացիական օրենսգրքում ուղղումներ անելը, ըստ որոնց՝ 5 կրոնական միությունների շնորհվում է հասարակական իրավունքի իրավաբանական անձի կարգավիճակ։
Խոսքը Հայ Առաքելական եկեղեցու, Հռոմեա-կաթոլիկ եկեղեցու, Մուսուլմանական համայնքի, Հրեական համայնքի և Բապտիստական եկեղեցու մասին է։
Պատրիարքը նշել է. «Անհրաժեշտ է երկրորդ և երրորդ ընթերցման ժամանակ դադարեցնել այդ օրենքի ընդունման ընթացակարգը և տվյալ խնդրի շուրջը կազմակերպել հասարակական դեբատներ, ինչի արդյունքում կձևավորվի միացյալ հասարակական կարծիք, և ձեռք կբերվի կոնսենսուս։ Իշխանությունները պետք է ստեղծեն բազմակողմ պետական հանձնաժողով, որը կքննարկեր այդ խնդիրը։
Վրացական եկեղեցին «երբեք» դեմ չի եղել և «մշտապես» աջակցել է այլ կրոններին կարգավիճակ շնորհելուն ու նրանց իրավունքներն ապահովելուն»։
Հիշեցնենք, որ Վրաստանի խորհրդարանում 5 կրոնական միություններին իրավաբանական անձի կարգավիճակի շնորհման առաջին ընթերցումը տեղի է ունեցել հուլիսի 1-ին։
