Xiaomi-ի հիմնադիր Լեյ Ցզյունը գրազ է եկել Չինաստանի օդորակիչներ արտադրող խոշորագույն Gree Electric Appliances Incorporated ընկերության ղեկավար Դուն Մինչժուի հետ, որ իր ընկերության եկամուտներն ավելի բարձր կլինեն և պարտվել է՝ կորցնելով 148 միլիոն դոլար, հաղորդում է Bloomberg-ը:
Ընկերության ղեկավարները գրազ են եկել 2013թ.-ին՝ չինական հեռուստատեսության եթերում: Այդ ժամանակ Լեյ Ցզյունը հայտարարել էր, որ հինգ տարուց Xiaomi-ի եկամուտներն ավելի բարձր կլինեն, քան Gree Electric Appliances-ինը: «Թող ամբողջ երկիրը վկա լինի: Եթե հինգ տարուց մեր եկամուտներն ավելի բարձր լինեն, քան Gree-ինը, նախագահ Դուն, խնդրում եմ ինձ մեկ յուան վճարեք»,- հայտարարել է Լեյը: Դուն Մինչժուն, իր հերթին, առաջարկել է գրազի գումարը հասցնել միլիարդի:
Ընկերությունների կոնկրետ ցուցանիշների մասին այդ ժամանակ խոսք չի եղել:
Սակայն, երբ ապրիլի 28-ին Gree Electric Appliances-ը հրապարակել է 2018-ի եկամուտների հաշվետվությունը, պարզվել է, որ այն ավելի բարձր է՝ ավելի քան 29 միլիարդ դոլար, այն դեպքում, երբ Xiaomi-ի եկամուտները կազմել են մոտ 26 միլիարդ դոլար:
Դեռևս պարզ չէ, թե պատրաստվում է արդյոք Լեյ Ցզյունը վճարել գրազը. 2013-ին նրա խոսքերն ավելի շատ հնչում էին որպես մարտահրավեր հաջողակ ընկերությանը, որը Xiaomi-ին գերազանցում էր բոլոր ցուցանիշներով:
Bloomberg-ի վարկածով աշխարհի ամենահարուստ մարդկանց վարկանիշում Լեյ Ցզյունը զբաղեցնում է 124-րդ տեղը: Նրա կարողությունը գնահատվում է 11.1 միլիարդ դոլար: Նրա հիմնադրած Xiaomi ընկերությունը 2018 թ.-ին աշխարհում սմարթֆոնների վաճառքի գծով զբաղեցրել է չորրորդ տեղը:
