Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին գոհունակություն է հայտնել հանրահայտ օտարազգի երաժիշտների՝ Վրաստան այցելելու և Բաթումում համերգներ տալու կապակցությամբ.
«Մեր երկրում համաշխարհային աստղերի հայտնվելը Վրաստանը դարձնում է առավել ճանաչելի երկիր միլիոնավոր մարդկանց համար, և դա նպաստում է զբոսաշրջության զարգացմանը։ Մեզ մշտապես հարցնում են, թե ինչո՞ւ ենք մենք գումարներ ծախսում աստղերի հրավիրման և նմանատիպ մեծ համերգների կազմակերպման վրա։
Ես ցանկանում եմ պատասխանել, որ առաջին հերթին այդ գումարները մեզ վերադարձվում են բարեգործության տեսքով, բացի այդ՝ այդկերպ մենք ցանկանում ենք տեսանելի դարձնել մեր երկիրը ողջ աշխարհում։
Այդպիսի միջոցառումները Վրաստան են գրավում մեծ թվով զբոսաշրջիկների, որոնց թիվը շուտով կհասնի 5 միլիոնի, իսկ 2-3 տարի անց՝ 10 միլիոնի։
Զբոսաշրջության զարգացումն իր հերթին արդեն իսկ սկսել է դրականորեն ազդել մեր քաղաքացիների բարեկեցության վրա, քանի որ դա նրանց հավելյալ եկամուտներ է ապահովում։ Օրինակ՝ այժմ Բաթումում շատ դժվար է վարձակալությամբ տուն գտնելը։ Բացի այդ, Արևմտյան Վրաստանի բնակիչները կարող են այստեղ ռեալիզացնել իրենց գյուղմթերքը»։
Հիշեցնենք, որ կիրակի օրը Բաթումում ամերիկացի հանրահայտ ջազային փողհար Քրիս Բոթին համերգ է տվել, որին բրիտանացի աշխարհահռչակ երաժիշտ Սթինգը հանդես է եկել հատուկ հյուրի կարգավիճակով։
Համերգի տոմսերն արժեցել են 380 լարի (մոտ 230 դոլար), իսկ կանգնելու համար նախատեսված տոմսերի գինը եղել է 90 լարի (մոտ 55 դոլար)։
Ի դեպ, հունիսի սկզբին էլ Թբիլիսիում տեղի էր ունեցել 2008 թվականի ռուս-վրացական պատերազմի մասին պատմող «Օգոստոսի 5 օրը» ֆիլմի շնորհանդեսը։ Դրան ներկա է գտնվել ֆիլմի նկարահանող խումբը, այդ թվում՝ ֆիլմի ռեժիսոր Ռեննի Հառլինը, դերասան Էնդի Գարսիան և հատուկ հրավիրված հոլիվուդյան աստղ Շերոն Սթոունը։
Հոլիվուդյան աստղերի մասնակցությամբ Թբիլիսիում կայացած բարեգործական ընթրիքը հավաքել էր 1.5 միլիոն լարի (945,000 դոլար)։ Վրաց գործարարներն այդ ընթրիքին մասնակցելու համար ստիպված էին եղել գնել 5000-10,000 լարի (3150-6300 ամերիկյան դոլար) արժեցող տոմսեր։
