«Հեղափոխության մեկ տարին լրանալու առիթով պետք է շնորհավորել նաև Հայաստանի հասարակությանը: Հեղափոխության խնդիրը՝ Սերժ Սարգսյանի և ՀՀԿ-ի հեռացումը, իշխանազրկումն էր, որն իրականություն դարձավ: Բայց հեղափոխության նպատակն իրականություն չի դարձել: Իմ համոզմամբ՝ հեղափոխության նպատակը խորքային, ընդգրկուն հասարակական-քաղաքական փոփոխություններն էին»,- «Առաջին լրատվական»-ի հետ զրույցում այս մասին ասաց «Քաղաքական լիգա»-ի համակարգող Նարինե Մկրտչյանը:
«Իհարկե տեղի ունեցան երկու ազատ ընտրություններ՝ առանց ընտրակաշառքի և առանց այլ արատավոր մեթոդների: Միաժամանակ պետք է արձանագրել, որ ազատ ընտրությունների նպատակը նույնպես չի կայացել, այսինքն՝ կուսակցական, քաղաքական դաշտի կայացում չեղավ, և արդյունքում ձևավորեցինք ապաքաղաքական խորհրդարան, որտեղ քաղաքական խնդիրների քննարկումներ գրեթե չեն լինում: Ես սա համարում եմ հեղափոխության նպատակներից շեղում, որի պատճառով հեղափոխությունը տեղապտույտ է ապրում:
Այս ընթացքում չի իրացվել նաև ընտրական համակարգը, նոր ԸՕ չի ընդունվել, և որ առավել կարևոր է՝ Հայաստանը շարունակում է ապրել հին Սահմանադրությամբ, մինչդեռ նոր իրավահարաբերությունները պետք է ամրագրվեին նոր Սահմանադրությամբ: Դա լուրջ բացասական հետագիծ կունենա Հայաստանի հետագա քաղաքական զարգացումների վրա, եթե այս սխալը չուղղենք: Հեղափոխականների խոստումներից էր սահմանադրական փոփոխություններ իրականացնելը, սակայն այսօր դա նրանց օրակարգում չկա»,- նշեց Նարինե Մկրտչյանը՝ հավելելով, որ «Քաղաքական լիգա»-ն ներկայացրել է տասը փաստարկ, թե ինչու պետք է փոխվի Սահմանադրությունը:
Մեր զրուցակցի դիտարկմամբ՝ Հայաստանում շատ բան է փոխարինում քաղաքականությանը, բայց իրական քաղաքականություն չկա. «Չկան առաջարկվող քաղաքական գաղափարներ, տեսակետներ և քաղաքական ուղերձներ: Մեկ տարին բավական էր քաղաքական փոփոխությունների սկիզբ դնելու համար… Բայց այսօր կան մարդիկ, որոնք կարծես օդից են հայտնվել խորհրդարանում»:
Մանրամասն՝ տեսանյութում:
