Ապրիլի 27-ին Ռուսաստանի նախագահ Վլադիմիր Պուտինը հայտարարել է, որ պատրաստ է ռուսական անձնագրեր տրամադրել բոլոր ուկրաինացիներին: «Մենք ընդհանրապես մտածում ենք այն մասին, որ Ուկրաինայի քաղաքացիներին պարզեցված կարգով տրամադրենք մեր քաղաքացիությունը»,- հայտարարել է նա:
Վլադիմիր Զելենսկին, որը հաղթել է Ուկրաինայի նախագահի ընտրություններում, իր Facebook-ում պատասխանել է այդ հայտարարությանը: Նա գրել է. «ՌԴ նախագահի հայտարարության կապակցութամբ ուզում եմ նշել հետևյալը:
Նախ՝ ես ռուսական իշխանություններին խորհուրդ չէի տա զուր ժամանակ ծախսել՝ փորձելով Ուկրաինայի քաղաքացիներին գայթակղել ՌԴ անձնագրերով: Հնարավոր է և գտնվի մեկը, ով մինչ այժմ գտնվում է քարոզչության տակ: Հնարավոր է՝ ինչ-որ մեկը դա անի հանուն վաստակելու կամ փորձելու համար թաքնվել քրեական հետապնդումից: Մենք նույնիսկ կարող ենք Վլադիմիր Պուտինին թվարկել Ուկրաինայի քաղաքացիների, որոնք մոտ ժամանակներս իրենց անհարմարավետ կզգան երկրում, որին նրանք ցինիկաբար կողոպտել են՝ չարաշահելով պաշտոնեական դիրքը: Թող Ռուսաստանը նորից որոշի՝ որտե՞ղ են նրան ամենից շատ պետք այդպիսի «պրոֆեսիոնալները»՝ Ռոստովո՞ւմ, թե՞ Մագադանում:
Բայց Ուկրաինայի տարբերությունը, մասնավորապես այն է, որ մենք՝ ուկրաինացիներս, մեր երկրում ունենք խոսքի ազատություն և ազատ ԶԼՄ-ներ ու համացանց: Ուստի մենք հրաշալի հասկանում ենք, թե իրականում ինչ է իրենից ներկայացնում ռուսական անձնագիրը:
Դա իրավունք է՝ կալանավորված լինելու խաղաղ բողոքի համար:
Դա իրավունք է՝ չունենալու ազատ և մրցակցային ընտրություններ:
Դա իրավունք է՝ ընդհանրապես մոռանալու սեփական իրավունքների և մարդու ազատության առկայությունը: Ուստի չարժի հույս դնել, որ շատ ուկրաինացիներ կցանկանան դառնալ «նոր նավթ», որին Ռուսաստանի իշխանությունները փորձում են վերածել սեփական ժողովրդին:
Ուկրաինացիները ազատ մարդիկ են ազատ երկրում: Անկախ, ինքնիշխան և անբաժան: Ուկրաինայի քաղաքացիությունը ազատություն է, արժանապատվություն և պատիվ: Դա այն է, ինչը մենք պաշտպանել ու պաշտպանելու ենք: Ուկրաինան չի հրաժարվի հետխորհրդային երկրների համար ժողովրդավարության օրինակ լինելու իր առաքելությունից: Այդ առաքելության մի մասը կդառնա պաշտպանության, ապաստանի և ուկրաինական քաղաքացիության տրամադրումը բոլորին, ովքեր պատրաստ են պայքարել հանուն ազատության: Մենք ապաստան կտրամադրենք և կօգնենք բոլոր-բոլորին, ովքեր պատրաստ են մեզ հետ կողք կողքի պայքարել հանուն մեր և ձեր ազատության:
Չարժե Ուկրաինայի և ուկրաինացիների հետ խոսել սպառնալիքի, ռազմական և տնտեսական ճնշման լեզվով: Դա կրակը մարելու և մինսկյան գործընթացը ապաշրջափակելու լավագույն ճանապարհը չէ:
Ես նորից ընդգծում եմ, որ պատրաստ եմ բանակցությունների: Ես հույս ունեմ, որ նորմանդական ձևաչափով առաջիկա հանդիպմանը Ռուսաստանը կցուցաբերի ապալարվածության պատրաստակամություն: Այդ պատրաստակամության կոնկրետ հաստատումը պետք է լինի մեր քաղաքացիների փոխանակությունը «բոլորին բոլորի դիմաց» ձևաչափով: Առանց բացառության: Մեր կողմից մենք պատրաստ ենք քննարկել Ուկրաինայի և Ռուսաստանի համագոյակցման նոր պայմանները՝ ըմբռնումով այն բանի, որ այժմյան նորմալացումը տեղի կունենա միայն ամբողջական ապազավթումից հետո: Ինչպես Դոնբասի, այնպես էլ Ղրիմի: Ուկրաինան չի հանձնվի: Այս բառի բոլոր իմաստներով:
Բայց ես հույս ունեմ, որ Ռուսաստանը համենայնդեպս ավելի շատ ձգտում է խոսելու, քան կրակելու:
Ես իսկապես Աստված չեմ, որպեսզի իմ ցանկություններն իրականանան: Բայց ես նաև հիշում եմ, որ բոլոր պաշտոնյաների համար գալիս է իրենց հանցանքների համար Նրա առջև պատասխան տալու ժամանակը: Ոչ ոք միանգամից դրախտ չի ընկնում:
Սկզբում Դատաստան է լինում»: