Ադրբեջանական Salam News գործակալության փոխանցմամբ՝ Թուրքիայի վարչապետ Ռեջեփ Թայյիփ Էրդողանը հերթական անգամ խորհրդարանում ներկայացված բոլոր ուժերին և երկրի հասարակական կազմակերպություններին կոչ է արել համատեղ աշխատել նոր Սահմանադրության մշակման վրա.
«Եթե մենք գանք կոնսենսուսի, «Ազգայնական շարժում» կուսակցության (ԱՇԿ) հետ հանգենք միացյալ կարծիքի, ապա կիրականացնենք նոր Սահմանադրության մշակմանն առնչվող մեր բոլոր պարտականությունները։
Հաշվի առնելով այն հանգամանքը, որ մեր երկրում ամենախոշոր ընդդիմադիր ուժը Ժողովրդա-հանրապետական կուսակցությունն (ԺՀԿ) է՝ մենք շատ ենք ցանկանում, որ այդ կուսակցությունն էլ ներգրավվի այս գործընթացում։ Դա շատ կարևոր է ժողովրդավարական խորհրդարանական համակարգի զարգացման տեսանկյունից»։
Հիշեցնենք, որ 1980 թվականի սեպտեմբերի 12-ին Թուրքիայի Հանրապետության պատմության ընթացքում տեղի ունեցած ամենաարյունալի ռազմական հեղաշրջումից հետո՝ 1981 թվականի հունիսի 29-ին, թուրքական ռազմական խունտան ընտրեց 160 խորհրդատուի, որոնց հանձնարարեց զբաղվել նոր Սահմանադրության մշակմամբ:
Վերջիններս առաջ քաշեցին 800 նոր օրենքներ: 1982 թվականի նոյեմբերի 7-ին նոր Սահմանադրությունը դրվեց հանրաքվեի ու ստացավ մասնակիցների 92 տոկոսի աջակցությունը: Դրանով մեծ լիազորություններ շնորհվեցին ուժային ու դատական կառույցներին, որոնց իրավունքների սահմանափակման ուղղությամբ տարիներ շարունակ պայքարում է Էրդողանը, և առաջիկա նոր Սահմանադրությունը գործուն քայլ կհանդիսանա տվյալ ուղղությամբ։