Ուկրաինայի ԱԳՆ-ն ԵՄ-ին, ԱՄՆ-ին և ՆԱՏՕ-ին խնդրում է քննարկել երկրի ինքնիշխանությունը պաշտպանելու բոլոր հնարավոր տարբերակները:
INTERFAX-ի հաղորդմամբ՝ այս մասին հայտարարել է երկրի արտաքին գործերի նախարարի պաշտոնակատար Անդրեյ Դեշիցան:
Նրա խոսքով՝ շաբաթ երեկոյան ինքը հանդիպել է ԱՄՆ-ի և Եվրամիության իր գործընկերների հետ:
«…մենք համապատասխան ուղերձներն ու նամակները փոխանցեցինք նրանց: Մենք ուղերձ փոխանցեցինք նաև ՆԱՏՕ-ին՝ խնդրանքով, որպեսզի քննարկեն բոլոր հնարավոր միջոցները Ուկրաինայի տարածքային ամբողջականությունը պաշտպանելու համար՝ հանուն Ուկրաինայի ժողովրդի և Ուկրաինայի տարածքում գտնվող միջուկային օբյեկտների պաշտպանության»,- ասել է Դեշիցան:
Դեշիցան նաև ասել է, որ առայժմ չի կարողացել կապվել ՌԴ ԱԳՆ ղեկավար Սերգեյ Լավրովի հետ: Նա նշել է, որ Լավրովին հրավիրում է «հանդիպել, խոսել և քննարկել Ուկրաինայի և Ռուսաստանի միջև եղած բոլոր հարցերը»:
Դեշիցան նշել է, որ Կիևը չի պատրաստվում իր դեսպանին հետ կանչել Ռուսաստանից՝ ի պատասխան Մոսկվայի համապատասխան քայլի:
