Ղազախստանի հասարակական-քաղաքական գործիչ, Ղազախստանի Միջազգային շարժման առաջնորդ Բախըտջան Կոպբաևը «Միտք» վիրտուալ քննարկումների ակումբին տված հարցազրույցում հայտարարել է, որ Ղազախստանի նախագահ ընտրվելու դեպքում մտադիր է ճանաչել Օսմանյան կայսրությունում իրականացված Հայոց ցեղասպանությունը:
«Ես, որպես ինտերնացիոնալիստի հստակ քաղաքացիական դիրքորոշմամբ մարդ, բնականաբար, դատապարտում եմ պաշտոնական իշխանությունների կողմից սեփական բնակչության դեմ կատարված նման չարագործությունները: Եվ բացարձակ տարօրինակ կլիներ 1915-1916թթ. Հայոց ցեղասպանությունը չճանաչելը: Եթե մենք ճանաչում ենք հիտլերականների կողմից հրեաների էթնիկ պատկանելությունից ելնելով ֆիզիկական բնաջնջումը, ապա ինչպես կարող ենք աչք փակել Օսմանյան իշխանությունների նմանօրինակ գործողությունների նկատմամբ: Այդ ժամանակաշրջանին վերաբերող բազմաթիվ փաստաթղթեր վկայում են հայ բնակչության կանխամտածված ոչնչացման մասին: Այս անունները՝ Թալեաթ փաշա, Իսմայիլ Էնվեր փաշա, Բեհաեդին Շաքիր և Մեհմեդ Նազիմ, մարդկության հիշողության մեջ հավերժ կասոցացվեն Հիտլերի անվան հետ:
Բոլոր զոհերի հիշատակին, որոնք բերվեցին մարդատյացության զոհասեղանին, մենք պայքարելու ենք Հայոց ցեղասպանության ճանաչման համար: «Սա արդեն պատվի հարց է», – ասել է նա:
