Գրականության մեջ կան մարդիկ, որոնք մարդկային, ազգային առումով նաև սանիտարի դեր են կատարում: Կարծում եմ՝ Խեչոյանն այն գրողն էր, որը նաև եզրեր, ճանապարհ է տալիս մեզնից յուրաքանչյուրին՝ ինքնամաքրվելու ճանապարհ գտնելու:
Կոմիտասի անվան կամերային երաժշտության տանը արձակագիր Լևոն Խեչոյանի «Մհերի դռան գիրքը» վեպի շնորհանդեսին «Առաջին լրատվական»-ի հետ զրույցում, խոսելով Լևոն Խեչոյանի գրականության մասին, նման կարծիք հայտնեց «Կարին» ազգագրական համույթի ղեկավար Գագիկ Գինոսյանը:
Նրա խոսքով՝ մեր այս խառնիճաղանջ օրերում, երբ ամեն ինչ կարծես պղտորվել է, առավել ևս՝ մարդկային հարաբերություններն ու ազգային արժեքները, մեզանից յուրաքանչյուրի համար ուղղակի մի հանճարեղ գտածո է Լևոն Խեչոյանը՝ ինքներս մեզ վերադառնալու, ինքներս մեր հոգիները վերանորգելու, ինքնամաքրվելու համար:
«Կարծում եմ՝ այս վերջին գիրքը, էպոսի հետ կապ ունեցող «Մհերի դռան գիրքը», ազգային առումով ավելի մեծ ասելիք ունեցող գիրք պետք է լինի, և հուսով եմ՝ մեզնից յուրաքանչյուրին ոչ միայն ինքնամաքրվելու, այլև գոտեպնդվելու ու մեզանից յուրաքանչյուրի առաքելությունը մեկ անգամ ևս սրբագրելու, վերաիմաստավորելու առիթ կլինի»,- համոզմունք հայտնեց «Կարին» ազգագրական համույթի ղեկավարը:
