ԱԺ ՀՀԿ խմբակցության ղեկավար Գալուստ Սահակյանը փետրվարի 28-ին ԱԺ ճեպազրույցների ժամին նշեց, որ ընդդիմության մեղադրանքներն իշխանության հասցեին նորմալ է ընդունում:
«Էդպես էլ պիտի լինի, ի վերջո, ընդդիմությունն ինչի՞ համար է, թող լինի»,- ասաց նա: Դիտարկմանը ի պատասխան, թե իրենց մեղադրում են Մարտի 1-ի դեպքերը բացահայտելու քաղաքական կամք չունենալու համար, Սահակյանը նշեց. «Եթե դա իրենց կմխիթարի, թող էդպես լինի: Ջանները դող ա ընկել, հիմա համարձակությունից են խոսո՞ւմ»: Հարցին՝ դողի պատճառն ի՞նչ է, խմբակցության ղեկավարը պատասխանեց, որ, իր պատկերացմամբ, ընդդիմության ներկայացրած ելույթները տանում էին նրան, որ այդ հանձնաժողովը չկայանա: «Դրա համար մարդիկ փորձում են բանակցել, խոսել, ոչ թե զրպարտել, զազրախոսել: Հանրապետականի տեսակետը կասեմ քվեարկությունից առաջ: Ես կարծում եմ՝ 96-ից հետո իշխանափոխություն եղավ, բայց չբացահայտվեցին այն ժամանակվա ոճիրները: Բացահայտումը կապված է, երբ մարդիկ, իսկ հարյուրավոր մարդիկ են հարցաքննվել, պիտի ինչ-որ մեկը վկայություն տա՝ տեսել է, չի տեսել, որ պահն է, դա քննչական պրոցես է, այնպես չի, որ հանկարծ քաղաքական գործիչների ցանկությամբ պետք է ամեն ինչ կատարվի: Եթե այս հանձնաժողովն էլ կազմավորվի, սա կլինի չորրորդ հանձնաժողովը»,- ասաց նա՝ համոզմունք հայտնելով, որ նման գործերը մութ երբեք չեն մնում, դա բացահայտվելու է: Ինքը՝ Սահակյանը, առավելապես տրամադրված է կարծել, որ ընդդիմության երևակայության արդյունքն է, թե իրենք չեն ցանկանում բացահայտել: Ընդդիմության մեջ ՀՀԿ-ական պատգամավորը չի տեսել մեկին, որ ցանկանում է հանձնաժողովի կազմում ջանասիրաբար աշխատել:
Լուսանկարը՝ Photolure-ի
