«Ինձ զայրացնում է, որ արվեստը քաղաքականացվում է, դա շատ վատ է: Արվեստը պետք է զերծ մնա քաղաքականությունից, առհասարակ չպետք է կապ ունենա քաղաքականության հետ: Բողոքս հասունացել էր, դա արդեն վերջին կաթիլն էր»,- այս մասին «Առաջին լրատվական»-ի հետ զրույցում ասաց քանդակագործ, նկարիչ-դիզայներ, ոսկերիչ Նուռը՝ անդրադառնալով իր հարցազրույցներից մեկում արված կտրուկ հայտարարությանն այն մասին, որ եթե Նազենի Ղարիբյանը մնա մշակույթի նախարարի պաշտոնում, ինքը կհեռանա երկրից:
Նուռի խոսքով՝ եթե օրենքը թերի է համարվում, ապա ավելի ճիշտ, ավելի խելացի կլինի օրենքը վերանայել, շտկել, հետո այդ օրենքով շարժվել. «Արվեստում օրենք է, որ գլխավորը արվեստագետն է, տնօրենը նրա աշխատողն է: Ամբողջ աշխարհում է այդպես»,- նշեց Նուռը՝ ընդգծելով, որ եթե արվեստագետին թելադրեն՝ ինչ անել, նա կդադարի արվեստագետ լինելուց:
Մշակութային ոլորտում ժամանակ առ ժամանակ ծագող խնդիրները, Նուռի դիտարկմամբ, համակարգային են, խորքային:
«Մշակույթի նախարարությունը իմիջային հասկացություն է… Իսրայելն իր մշակույթի նախարարությունը միացրեց պաշտպանության նախարարությանը. պատերազմող երկիր, որի համար պաշտպանությունը գերակա շահ է, և մշակույթը դարձավ երկրորդ գերակա շահ… Մեր մշակույթի նախարարությունը, համաձայն եմ, չի գործել այնպես, ինչպես պետք էր, բայց միգուցե այնպես անենք, որ գործի, ոչ թե փակենք»,- նշեց արվեստագետը: Նրա դիտարկմամբ՝ մշակույթի նախարարությունը մենջմենթի բյուրո է, որը պետք է զբաղվի հայկական մշակույթի տարածմամբ, բարելավմամբ, և այնտեղ պետք է աշխատեն պրոֆեսիոնալներ»:
Մանրամասն՝ տեսանյութում:
