Լուրեր
Ինչ է կատարվում համայնքներում. մարզպետները խոստովանում են՝ հնի ու նորի բախում է

Հեղափոխությունից հետո համայնքներն ակտիվացել են, փորձագետները դա բացատրում են կառավարման համակարգ ներթափանցած ազատությամբ, ինչն էլ պարբերաբար դրսևորվում է հանրապետության տարբեր բնակավայրերում, երբեմն բողոքի ակցիաների տեսքով:

Թեմայի շուրջ «Առաջին լրատվական»-ի հետ քննարկմանը մասնակցեցին Կոտայքի մարզպետ Ռոմանոս Պետրոսյան, Արմավիրի մարզպետ Համբարձում Մաթևոսյանը, Վայոց ձորի մարզպետ Տրդատ Սարգսյանը:

Հիշեցնենք՝ զարթոնքցիները տևական ժամանակ է՝ պայքարում էին արդեն 23 տարի պաշտոնավարող գյուղապետի հրաժարականի համար։ Լարվածությունն այն աստիճան էր սրվել, որ անգամ հրաձգություն եղավ, կան վիրավորներ։

Հ. Մաթևոսյանի հավաստմամբ՝ Զարթոնք համայնքում բողոքի ալիքները սկիզբ են առել երկու ամիս առաջ, փորձ է արվել կողմերի միջև հանդիպում կազմակերպել, բայց չի ստացվել, քանի որ կողմերը համաձայնության չեն եկել: «Այս ընթացքում հանդիպումներ եմ ունեցել Զարթոնքի համայնքապետի հետ, պայմանավորվածություն ունեինք՝ կապված նրա հրաժարականի հետ՝ համարելով, որ դա ամենաողջամիտ լուծումը կլինի: Բայց շաբաթն ուրբաթից շուտ եկավ, տեղի ունեցան շատ վատ իրադարձություններ, կրակոցներ եղան, մի շարք մարդիկ հոսպիտալացվեցին, ոմանք բերման ենթարկվեցին»,- նշեց մարզպետը: Նրա խոսքով՝ Զարթոնքի համայնքապետի նկատմամբ քրեական գործ է հարուցվել՝ հիմնականում համայնքի բնակիչների կողմից ներկայացված չարաշահման և խախտումների վերաբերյալ փաստերի հիման վրա:

Հ. Մաթևոսյանը հավելեց, որ առաջիկայում կլինեն արտահերթ ընտրություններ, կողմերը կքվեարկեն իրենց նախընտրած թեկնածուի օգտին:

Մարզպետները խոստովանում են, որ համայնքներում տեղի է ունենում հնի ու նորի բախում: «Տասնամյակներ շարունակ մեր երկրում եղել է ստատուս քվո՝ ուժերի որոշակի հարաբերակցությամբ պայմանավորված, և խաղի կանոններ, հեղափոխությունից հետո խաղի կանոնների փոխարեն առաջ եկավ օրենքի գերակայությունը: Համայնքներում նախկինում «դաբրո» ստացած համայնքապետները չեն կարողանում հաշտվել նոր իրողությունների հետ: Համայնքների բնակիչները բողոքում են այն իրողությունից, որ 15-20 տարի ղեկավարելով՝ նրանց կյանքի որակի վրա ազդեցություն է ունեցել տվյալ համայնքապետը: Մեր մարզում 5 համայնքապետների նկատմամբ քրեական գործեր են հարուցված»,- նշեց Ռ. Պետրոսյանը:

Տ. Սարգսյանն ընդգծեց, որ Վայոց ձորի համայնքները խոշորացվել են, նոր համայնքապետներ են ընտրված՝ նոր աշխատելաոճով, և դեռ բողոքները շատ չեն. «Խնդիրները սեղանի շուրջ են քննարկվում, փորձում ենք լուծումներ գտնել»:

Մարզպետների դիտարկմամբ՝ առկա է նաև օրենսդրական բաց. «ՏԻՄ գործող օրենքում սահմանափակում չկա համայնքապետի ղեկավարման ժամկետի առումով, ինչպես նաև համայնքի ղեկավարի հետկանչի ինստիտուտ չկա: Առաջարկներ ենք ներկայացրել, օրենքի նոր նախագծում այդպիսի նորմեր կան»,- նշեց Ռ. Պետրոսյանը:

Մանրամասն՝ տեսանյութում:

  • Դիտումներ՝ *