ԱՄՆ նախագահ Դոնալդ Թրամփն առաջիններից է արձագանքել Փարիզի Աստվածամոր տաճարի հրդեհին՝ գրառում կատարելով թվիթերյան իր էջում: Նրան հետևել են այլ երկրների լիդերները: Բոլորը վշտակցել են ֆրանսիացիներին և հույս հայտնել, որ տաճարը կվերականգնվի:
Դոնալդ Թրամփ, ԱՄՆ նախագահ
«Այնքան սարսափելի է տեսնել հրդեհը Փարիզի Աստվածամոր տաճարում: Աստված օրհնի Ֆրանսիայի ժողովրդին»:
Վլադիմիր Պուտին, ՌԴ նախագահ
Վլադիմիր Պուտինը հեռագիր է հղել Ֆրանսիայի նախագահ Էմանուել Մակրոնին՝ ցավակցություն հայտնելով նրան և ամբողջ ֆրանսիացի ժողովրդին Փարիզի Աստվածամոր տաճարում բռնկած հրդեհի կապակցությամբ: «Նոտր Դամը Ֆրանսիայի պատմական խորհրդանիշն է, եվրոպական և համաշխարհային մշակույթի անգին գանձը, քրիստոնեական կարևորագույն սրբավայրերից մեկը»,- ընդգծել է ՌԴ ղեկավարը:
Պուտինը հույս է հայտնել, որ տաճարը կհաջողվի վերականգնել, և առաջարկել Է Ֆրանսիա ուղարկել «ռուսաստանցի լավագույն մասնագետներին, որոնք համաշխարհային մշակութային ժառանգության հուշարձանների վերականգնման հարուստ փորձ ունեն»:
Հայկո Մաաս, Գերմանիայի արտաքին գործերի նախարար
«Այս հրդեհը խիստ վշտացրել է գերմանացիներին, մեր ֆրանսիացի եղբայրների կողքին ենք: Հույս ունենք, որ հրդեհը կորուստներ չի բերի»:
Սթեֆեն Սեյբերտ, Գերմանիայի կանցլեր Անգելա Մերկելի մամուլի քարտուղար
«Այնքան մեծ ցավ ենք ապրում՝ տեսնելով Փարիզի Աստվածամոր տաճարը կրակի մեջ: Տաճարը Ֆրանսիայի և եվրոպական մշակույթի խորհրդանիշն է: Մենք Ֆրանսիայի ժողովրդի կողքին ենք»:
Սադիք Խան, Լոնդոնի քաղաքապետ
«Սարսափելի տեսարան է, Փարիզի Աստվածամոր տաճարը՝ կրակի ճիրաններում: Լոնդոնը Փարիզին վշտակից է այսօր և բարեկամ՝ ընդմիշտ»:
Թերեզա Մեյ, Մեծ Բրիտանիայի վարչապետ
«Փարիզի Աստվածամոր տաճարի հրդեհը ողբերգություն է Ֆրանսիայի և ամբողջ Եվրոպայի համար: Կրակը ավերում է 850 տարվա պատմությունը, ճարտարապետությունը, քանդակագործությունը և նկարչությունը: Դժվար կլինի դա մոռանալ: Ֆրանսիան կարող է հույսը դնել մեզ վրա՝ վերականգնելու ժառանգությունը»:
Ժաիր Բոլսոնարո, Բրազիլիայի նախագահ
«Խոր վշտի մեջ ենք: Սարսափելի հրդեհն ավերել է քրիստոնյաների հոգևոր և մշակութային խորհրդանիշերից մեկը: Մեր աղոթքներն ենք ուղղում ֆրանսիացիներին»:
Սաադ Հարիրի
«Ամբողջ աշխարհը խոր վշտի մեջ է` տեսնելով Փարիզի Աստվածամոր տաճարի հրդեհը: Լիբանանի ժողովուրդը Ֆրանսիայի հետ է: Սա աննկարագրելի հարված էր մարդկությանը և նրա ժառանգությանը»:
Աբդուլ Ֆաթթահ Ալ-Սիսի
«Սա հսկայական կորուստ էր: Եգիպտոսի ժողովուրդը ֆրանսիացիների կողքին է: Հուսով եմ, որ աղետի հետևանքներն անդառնալի չեն լինի և տաճարը կվերականգնվի»: