«Առաջին լրատվական»-ի զրուցակիցն է ԱԺ նախկին պատգամավոր, գործարար Հակոբ Հակոբյանը:
– Պարոն Հակոբյան, վերջին օրերին ԱԺ–ում տրանսգենդերի ելույթից հետո ԲՀԿ–ի ու «Իմ քայլը» դաշինքի միջև լարվածություն է ստեղծվել: Երկուստեք հնչում են մեղադրանքներ: Վարչապետ Նիկոլ Փաշինյանն անգամ հայտարարեց, որ կատարվածը քաղաքական պրովոկացիա էր ԲՀԿ–ի կողմից ուղղված «Իմ քայլի» դեմ: Դուք ԲՀԿ–ի մեղավորությունը տեսնո՞ւմ եք:
– Քաղաքականության մեջ պրովոկացիաներ էլ կլինեն: Կլինեն խոստումներ, խոստումներ դրժողներ: Քաղաքականությունն այնպիսի կառույց չի, որ դնեն ռելսերի վրա, իր համար սահուն գնա: Քաղաքականությունը հարթակ է, որտեղ տեղի են ունենում կարծիքների բախում: Եթե կարծիքների բախում չլինի, երբեք խելացի մտքեր, որոշումներ չեն ծնվի: Այնպես չէ, որ մի քաղաքական ուժի ասածին պետք է անպայման ենթարկվեն բոլորը ու ընդունեն: Դա չի լինի քաղաքական ամբիոն:
– Այսինքն՝ դուք ընդունո՞ւմ եք, որ ԲՀԿ–ի կողմից պրովոկացիա է եղել:
– Ես արդեն ասացի, որ նման բաներ տեղի են ունենում քաղաքականության մեջ: Ինչ վերաբերում է ձեր կողմից նշված միջադեպին, ապա տարբեր կարծիքներ կարող են լինել, որը նույնպես նորմալ է: Առհասարակ, ես կարծում եմ, որ միայն Արցախի հարցում պետք է միակարծություն լինի: Մնացած բոլոր իրավիճակներում կարծիքները պետք է տարբեր լինեն տարբեր հարցերի ու երևույթների նկատմամբ:
– Իսկ Դուք առհասարակ ինչպե՞ս եք գնահատում կատարվածը: Տրանսգենդերի ելույթը փոթորկել է հայ հանրությանը: Վերջին օրերին տարբեր խմբեր բողոքի ակցիաներ են անում:
– Մենք վերջապես պետք է հասկանանք, որ մենք պետք է աշխատենք ու ապրենք աշխարհի կանոններով: Մեզ չպետք է դնենք շատ խելացիի տեղ, կամ շատ մեծ հայրենասերի տեղ: Մենք պետք է ենթարկվենք ու հաշվի նստենք աշխարհի օրենքների հետ:
Եթե ուզում ենք, որ աշխարհից չմեկուսանանք, աշխատենք ու ապրենք բոլորի հետ հավասարը հավասարի պես, կարողանանք հաղորդակցվել նրանց հետո աշխարհի կանոններով: Մենք չենք կարող դառնալ աշխարհին թելադրող:
– Ուզում եք ասել, որ նման երևույթները, նման դրսևորումները չպետք է սվիններով ընդունվի, քանի որ աշխարհում ընդունված են դրանք:
– Ես կարծում եմ, որ աշխարհի կանոնները պետք է ընդունվեն և, որ ամենակարևորն է, մարդու իրավունքները երբևէ չպետք է ոտնահարվի: Մարդը պետք է ազատ լինի իր որոշումների, իր արտահայտվելու իրավունքի հարցում: Իսկ թե ով դա ինչպես կմեկնաբանի, դա արդեն իրենց գործն է: Մեկնաբանողը ևս ազատ է իր մեկնաբանությունների մեջ: Եթե հասարակությունը մերժում է այդ երևույթը, թող մերժի, բայց ոչ մի պարագայում վայրի ձևով: Թող մերժեն, թող բողոքեն, բայց քաղաքակիրթ, աշխարհում ընդունված ձևերով: Թող կարծիքների բախում լինի, մարդիկ արտահայտվեն, բայց կրկնում եմ՝ քաղաքակիրթ ձևով:
– Նախօրեին, օրինակ, ԱԺ–ի մոտ ակցիայի ժամանակ հավաքվածները առաջարկում էին վառել, քառատել տրանսգենդերներին և առհասարակ ԼԳՏԲ համայնքի ներկայացուցիչներին: Դուք սա՞ եք համարում վայրի մեթոդ:
– Այո, ես չեմ ընդունում կարծիքները, թե նրանց պետք է վառել, կտրատել: Իհարկե, չի կարելի նման բան: Չի կարելի քրեորեն պատժելի արարք կատարել կամ այլ մարդկանց դրդել, ուղղորդել նման գործողությունների: Մարդը պետք է ազատ լինի, բայց այդ ազատությունը արտահայտելը, գործողությունները պետք է քաղաքակիրթ լինեն: Թող տարազ հագած երգեն-պարեն, ինչ ուզում են՝ անեն, բողոքեն: Դա շատ կարևոր է, բայց ոչ մի պարագայում այդ ամենը, կրկնում եմ՝ չպետք է լինի վայրի մեթոդներով: Ինչ է նշանակում վառել, կտրատել, սպանել: Ես չեմ ընդունում սա: Այդ հայտարարություններն անգամ քրեորեն պատժելի արարք են:
– Այդ դեպքում Ձեր նշած վայրի մեթոդների դիմելն ինչի՞ արդյունք է: Մտածողությա՞ն։
– Ես չգիտեմ: Մարդ կա իրեն է ցույց տալիս, մարդ կա օրենք չգիտի դրա համար, երրորդը պարզապես ինքնադրսևորվում է: Ամեն մեկն իր դրդապատճառն ունի, բայց մարդիկ պետք է կարողանան այնքան քաղաքակրթվեն, որ ցանկացած հարց, օրենք քննարկեն, փոփոխություններ առաջարկեն, խոսեն, արտահայտվեն, բողոքեն, բայց ամեն ինչ օրենքի շրջանակներում: Մենք ինչ պետք է պատասխանենք եվրոպական երկրներին, ինչպես պետք է բացատրենք, որ մոզ մոտ դեռ վայրի մեթոդներ են կիրառվում: Դրսում դա չեն հասկանա, ոնց էլ բացատրենք: