Եվրախորհրդարանի նախագահ Մարտին Շուլցը հիասթափված է դատավորների և դատախազների լիազորությունները Թուրքիայի արդարադատության նախարարությանը փոխանցելու օրենքից, գրում է Ria Novosti-ն:
Թուրքիայի նախագահ Աբդուլա Գյուլը չորեքշաբթի օրը հաստատել է իրավական գործունեությունը կարգավորող օրինագիծը, որի համաձայն՝ երկրի դատաիրավական համակարգի հիմնական լիազորությունները փոխանցվում են արդարադատության նախարարությանը:
«Հիասթափված եմ նոր սահմանափակող օրենքով, որը սպառնալիք է դատական համակարգի անկախությանը և հարցականի տակ է դնում ԵՄ-ի հետ ձեռք բերված պայմանավորվածություններին հավատարիմ մնալու Թուրքիայի ձգտումները»,- նշել է Շուլցը Twitter-ի իր միկրոբլոգում:
Այս օրենքը ընդդիմության և Թուրքիայի հասարակական կազմակերպությունների կողմից բացասական վերաբերմունքի է արժանացել: CNN Turk հեռուստաալիքի տվյալներով՝ ընդդիմադիր Ազգային-հանրապետական կուսակցության ներկայացուցիչները արդեն պատրաստվում են Սահմանադրական դատարան դիմել:
