Ռուսական ազդեցության կարճաժամկետ կորուստը կարող է ՌԴ երկարաժամկետ ազդեցության հաստատմանը հանգեցնել: Այս մասին այսօր լրագրողների հետ հանդիպման ժամանակ ասաց Տարածաշրջանային հետազոտությունների կենտրոնի ղեկավար, քաղաքական վերլուծաբան Ռիչարդ Կիրակոսյանը՝ անդրադառնալով ուկրաինական զարգացումներին:
Նա նշեց, որ այն, ինչ տեղի էր ունենում Ուկրաինայում, արդեն իսկ աճել է ընդդիմություն-իշխանություն հակամարտությունից՝ վերջին շաբաթների ընթացքում դառնալով Արևմուտք-Մոսկվա մրցակցություն: Նա նկատեց, որ բոլորս ականատես դարձանք արևմտյան դիվանագիտական ակտիվության. ԵՄ անդամ 3 երկրների ԱԳ նախարարները միջնորդ հանդիսացան մի համաձայնության, որպեսզի անցկացվեն արտահերթ նախագահական ընտրություններ, և վերականգնվի սահմանադրությունը: Սակայն սա ուշացած էր, քանի որ գործողությունները շատ ավելի արագ ընթացան՝ առաջ անցնելով դիվանագիտական ակտիվությունից:
Ըստ վերլուծաբանի՝ հետաքրքիր էր նաև, որ եվրոպացիները գործունեություն էին ծավալում Ուկրաինայում, իսկ ռուսները չէին զբաղվում՝ Ուկրաինայում ՌԴ դեսպանը ձայն չէր հանում:
«Միաժամանակ ՌԴ-ն Ուկրաինա Ռոգոզինին չուղարկեց, ուղարկեց Լուկինին, որն ավելի նուրբ կերպար է: Շատ ավելի խոր իմաստ կա այստեղ. նախկինում Լուկինը ՌԴ դեսպանն էր Վաշինգտոնում, ինչը ցույց է տալիս, որ ՌԴ-ն չէր ցանկանում Արևմուտքին սադրել: Ուկրաինայում ընդդիմության հաղթանակը կարող է փրկել Վիլնյուսը և փրկել ԱՀ-ն: Այսինքն՝ Վրաստանը և Մոլդովան միայնակ չեն լինի այլևս: Նոր թափ կհաղորդվի Արևելյան գործընկերությանը:
Ուկրաինայում ընդդիմության հաղթանակն օրինակ էր, թե ինչպես կարելի է պայքարել եվրոպական արժեքների համար և հաջողել այն:
Ուկրաինայում տեղի ունեցած իրադարձությունների արդյունքում կիզակետի փոփոխություն է նկատվելու, ԵԽ ընտրությունները Ուկրաինայում կայանալիք նախագահական ընտրությունների հետ միասին նույն օրն են անցկացվելու: Իմ փաստարկն այն է, որ ԵՄ-ն ավելի կարևոր է դառնում, քան նախկինում, Ուկրաինան ևս»,- նշեց նա:
Ռիչարդ Կիրակոսյանը նշեց, որ ուկրաինական զարգացումները կունենան ինչպես դրական, այնպես էլ բացասական ազդեցություն: Ըստ նրա` բացահայտվեց ռուսական ազդեցության սահմանափակությունը, բացահայտվեց նաև, որ ՌԴ-ն Ուկրաինայում իրական միջնորդ չի կարղ լինել:
«ՌԴ-ն կորցրեց Ուկրաինան՝ որպես եվրասիական միության պոտենցիալ անդամ: Երրորդ բացասական ազդեցությունը Պուտինի՝ անձնական վատ վիճակի մեջ հայտնվելն էր: Բացահայտվեց նրա դիրքերի թուլությունը: Ուկրաինական ելքը ցույց տվեց, որ հետխորհրդային երկրները կարող են «ոչ» ասել Մոսկվային, այսինքն` ռուսական ազդեցության սահմանները:
Մեկ այլ բացասական գործոն էր այն, որ Սոչիի օլիմպիական խաղերի վրա ծախսվել էր հիսուն միլիարդ դոլար, սակայն Ուկրաինայում տեղի ունեցածի արդյունքում ՌԴ-ի իմիջը վնասվեց: Ապագա Ուկրաինայի հեռանկարը կարող է վտանգել ռուսական շահերը: Խոսքը Սևաստոպոլում ռուսական ռազմաբազայի և Ուկրաինայի տարածքով ռուսական գազը հասցնելու գազատարի, Ուկրաինայում ռուս օլիգարխների մասին է:
Վերջին բացասական ազդեցությունը կարող է լինել այն, որ ժողովրդավարական Ուկրաինայի տեսլականը ուժեղ վտանգ կարող է լինել Պուտինի դիրքերին»,- մեկնաբանեց Ռիչարդ Կիրակոսյանը: Վերլուծաբանը նաև ասաց, որ որպես դրական ազդեցություն կարող է որակվել այն, որ Պուտինն անձնապես երբեք չի համակրել Յանուկովիչին, այսինքն` Ուկրաինան կորցրեց մի առաջնորդի, ում չի վստահել ՌԴ-ն: Երկրորդ դրական ազդեցությունն այն է, որ Ուկրաինայի սահմանին կայունությունը շատ ավելի կարևոր է ՌԴ-ի համար, քան հնազանդվող երկիրը:
Նա նշեց, որ Արևմուտքը նույնիսկ պետք է ընդունի, որ Ուկրաինայի ապագան կախված է ՌԴ-ից: «Այժմյան ռուսական ազդեցության կարճաժամկետ կորուստը կարող է ՌԴ երկարաժամկետ ազդեցության հաստատմանը բերել: Ուկրաինայի ապագայի համար կան մարտահրավերներ` միանշանակ, բաժանման կիսման վտանգն է, ավելի կարևոր է նոր իշխանության խոցելիությունը, բաժանված և վիճարկվող առաջնորդություն ունի, և երբ նոր Ուկրաինայի կառավարման գործընթացն ավելի դժվար է, քան նախկինի տապալումը, իհարկե սնանկության և տնտեսական կործանման վտանգը»,- նշեց նա:
Հարցին, ինչու պարտվեց ՌԴ-ն Ուկրաինայում` բանախոսը պատասխանեց, որ սկզբում ՌԴ-ն, ինչպես յուրաքանչյուր ոք, անսպասելի իրավիճակում հայտնվեց: «ՌԴ-ն որոշեց անմիջականորեն չներգրավվել, ձեռքերը հեռու քաշել, սա նաև կարող է նշանակել, որ ՌԴ-ն կփոխի իր քաղաքականությունը ՀՀ-ի հանդեպ դեպի դրական, լիահույս եմ, որ ՌԴ-ն կսկսի ավելի շատ հարգել Հայաստանին: Ես հուսով եմ արդարացված է լավատեսությունս»,- այսպես ավարտեց իր խոսքը Ռիչարդ Կիրակոսյանը:
Նրա համոզմամբ՝ ուկրաինական օրինակից դասեր պետք է քաղեն Հայաստանի ընդդիմությունն ու իշխանությունը: «Ուկրաինան բացահայտեց, թե որքան վտանգավոր է հաշվի չառնել փողոցի ուժը և գերագնահատել ուժի կիրառումը: Վտանգավոր է արհամարհել հանրային տրամադրոթյունները:
Երրրոդ դասը՝ թե ինչ պատահեց այն բանից հետո, երբ Յանուկովիչը փախուստի դիմեց: Հետադարձ հարվածը, որը կրեց Ուկրաինան իշխանության գոռոզության արդյունքում և այն առումով, որ տեսան՝ ինչպես էր նա ապրում»,- ասաց նա:
Վերլուծաբանը նշեց, որ Ուկրաինան բացահայտեց, որ հասարակական տրամադրությունները հաշվի առնելով՝ երեք պահանջ կա ընդդիմությունից՝ առաջնորդություն, կազմակերպվածություն, ռազմավարական տեսլական: «Հայկական հին ընդդիմությունը ձախողվել է երեքից յուրաքանչյուրում: Եթե նրանք լսում ու սովորում են, նորամուծությունները և նոր մարտավարությունն էական են: Աշխարհագրության կարևորությունն է նաև, այլ կերպ ասած՝ ակտիվությունը շրջաններում, ոչ թե միայն մայրաքաղաքում: Ուկրաինայի անվտանգության մարմինների պատասխանը թույլ էր, քանի որ շրջաններում ևս ակտիվություն կար:
Ինչպիսին կլինի Ուկրաինայի ապագան՝ սա ամենակարևոր հարցն է»,- նշեց քաղաքական վերլուծաբանը: