Օրենքով գող Տարիել Օնիանին, որը քրեական շրջանակներում հայտնի է Տարո անունով, ազատության մեջ հայտնվելուց հետո պատրաստվում է բնակվել Թուրքիայում: Այս մասին հայտարարել է նրա փաստաբան Ալեքսանդր Կոբաիձեն, հաղորդում է «ՊրայմԿրայմը»:
«Տարիելը պատիժը կրել է Ռուսաստանում, և ես հաստատում եմ, որ նա կժամանի Թուրքիա` Ստամբուլ: ՌԴ-ն սահմանափակումներ է սահմանել ոչ միայն նրա, այլ բոլոր օրենքով գողերի համար: Իմ տեղեկությունների համաձայն, նա առայժմ պատրաստվում է ապրել Թուրքիայում: Նա Վրաստանի քաղաքացի չէ»,- ասել է փաստաբանը:
Ապրիլի 9-ին, Քութաիսիի գողերի կլանի ղեկավար 61-ամյա Տարիել Օնիանին վաղաժամ պետք է դուրս գա Սոլ-Իլեցկում գտնվող խիստ ռեժիմի թիվ 6 «Սև դելֆին» հատուկ ռեժիմի գաղութից:
2010 թ.-ի հուլիսին Մոսկվայի Խամովնիկի դատարանը նրան 10 տարվա ազատազրկման էր դատապարտել մարդու առևանգման և շորթման համար: Պատժի ժամկետը լրանալու էր 2019-ի հունիսի 11-ին, սակայն գողին հաջողվել է հասնել ժամկետի մինչև 9 տարի 10 ամիս կրճատմանը:
Ըստ «Ռոսբլատի», Օնիանին այժմ քրեական աշխարհում ամենաազդեցիկ հեղինակությունն է: Նրա ազատվելուց հետո կսրվի թիվ 1 օրենքով գողի տեղի համար պայքարը:
